BYF, BDF, BCD Corner | KTZ

EPHESA SAPTUAM KIANG A LAIKHAK

Laisiangthou Pansan: Kilakna 2:1-7

Thumasa: Khalui in, Ephesa Saptuam kiang a laikhak a khen II na ‘Ephesa Saptuam kiang a Thugentu’ chihtan i enkhawm khin a tutung in khenpi III na Jesu Khrist in Ephesa Saptuam a Phatnate i en khawm nawn ding hi.

III. Jesu Khrist in Ephesa Saptuam A Phatnate (Tang 2, 3, 6b)

Na Thilhihte Ka Thei

Saptuam sagihte lak a om a, a dinmun uh leh a hihna uh thei dia vialvak a suichian Toupa Jesu Khrist in Ephesa saptuam a theichian hi. Aman anuai a thil 4-te ziak in Ephesa saptuam kipahpih in A phat hi.

1. A Sepgimna uh leh Kuhkalna Uh

Ephesa saptuam mite mithadah hilou in mitaima ahi uh. Jesu Khrist a ginna un kuhkal tak in nna a sem sak hi. A nasep uh hiaite ahi chih taklat hikei mah leh huai hun ngaihtuah in gingloumite kiang a tanchin hoih gen; tagah, genthei leh tasamte panpih; Jesu Khrist a gintak ziak ua a inkuanpihte hawlkhiatte omna ding leh a poimohte uh piak, chihte leh adang dang hingei di’n gintak huai hi. Hiai bang a nasep thil nuam leh awlsam hikei mah leh lungke lou in kuhkal tak in sem uhi. Toupa Jesu Khrist in hiai bang a a nasep uh hoih sa in A phat hi.

Jesu Khrist i ginna in tanchin hoih a hon gensak a, nna hoih ahon sepsak ding ahi. Jesu Khrist gingta, hotdam ka hita chinapi a nna hoih i sep tuan kei leh ginna si nei hikha ding i hi. Jakob 2: 14-26 ah Jakob in ginna hing leh nasep kikhen lou a kizui zel ahihdan a gen hi. Tang 17- 20 ah Jakob in “... ginna leng thilhih neilou a amah kia a a om leh si ahi. Mi kuahiam in ‘Nang ginna na nei a, ken thilhih ka nei hi. Na ginna na thilhih pang lou in hon ensak inla, ken thilhih in ka ginna kon ensak ding, a chi thei hi. Pathian khat kia a om chih na gingta maw? Na hihhoih e: dawite’n leng a gingta ua, a ling zel uhi, a chi ding hi. Mi thulimlou aw, thilhih panglou a ginna lel bangmah ahi kei chih na thei nuam hia?

2. A Thugin Dik Uh

Ephesa saptuam in thugin dik tak a nei uhi. A thugin dik uh Toupa Jesu Khrist in phat mahmah hi: “Migiloute na ngaihmoh dan, hiloupi a sawltak kichite na ze-et a, amaute zuauthei ahi uh chih na muhkhiat dan ka thei hi.” Ephesa saptuam in a thugin dik neih uh gum thei uhi. Sawltak kichi leh a thu sinsakte uh khatpeuh kipahpih in a pom pah mawk kei ua, enchian masa in a dikloute phoukhia uhi.

Khate theihkak theihna thilpiak a zatna ding tak ah zang thei uhi. Huai hun lai in sinsaktu diklou tamtak a om uhi. Nasepte 20:17-35 ah sawltak Paul in Ephesa saptuam’ upate a mangpha khakna thu a gen hi. A thugenna ah Ephesa saptuam mite thugin dik apan zekhem khiat tum sinsaktu dikloute (Ngehangte) a hong pai ding uh, chi’n hilhkholh a pilvang ding in hilh hi. Hiai bang a sawltak Paul thuhilhna a limsak a thugin dik a lenkip tinten ziak un Jesu Khrist in Ephesa saptuam phat hi.

Huai hun lai a mah bang in tu hun inleng sinsaktu diklou tamtak a om hi. Amaute’n dangnal tak in dik hileh kilawm ahihkeileh thudik kimkhat zang in saptuamte hong zekhem in sinsakna diklou ah hong kaihlut tum uhi. Saptuam makaite’n Laisiangthou pansan a amaute leh a thusinsakte uh a na enchian a, a diklouhnate uh saptuam mite theisak a, sinsakna diklou apan saptuam i venbit ding ahi.

3. A Bahlouhna uh

Sawltak Paul in Ephesa saptuam a phuhkhiat nung kum 40 vel ding a sawltak Johan in hiai lai a khak ahi. Phuhkhiat ahih apan tutan kum 40 sung vel ding Toupa leh a thutak ah Ephesa saptuam a ginom tawntung hi. Haksatna leh sawina tuak mahle uh, Toupa Jesu Khrist’ min kuhkal tak a thuak in a pang teitei ua, a bah kei uhi. Hiai bang a thuakzohna uh, a bahlouhna uh Toupa Jesu Khrist in kipahpih in amaute phat hi.

4. Nikol Pawlte’ Thilhihte A Huat Uh

Nikol pawlte kichi saptuam a gindan leh paidan diklou zui leh sinsak pawl lianlou mite ahi uh. Ahong kipatna, gindan leh paidan uh toh kisai Laisiangthou siamte theihdan kibang kim kei mah leh a tangpi a gen in hiai bang ahi

a. Nikolpawlte kichi Grik thumal nikao, “vualzou” chihna leh laos, “mipite” chihna apan kilakhia ahi a, “mipite tung a vualzou” ahihkeileh “mipite zou” (One who conquers the people) chihna ahi. Nikol Pawlte’n saptuam a mivantangte’ khalam zalenna (spiritual liberty) laksuh sak in thuneihkhum uhi. Nikolpawlte anung a bukim tak a hong om, a thuthu a saptuam mivantangte thuneihkhum a vaihawmkhum heutute’ mataipawlte” (Forerunners of the clerical hierarchy) ahi uh.

b. Nikolpawlte Nasepte bung 6 a saptuam masa in niteng thilhawm enkai leh sai ding mi sagih a telkhiatte uh lak a khat Nikola kichi sinsakna zuipawlte ahi uh. Saptuam a makai khat himahleh Nikolas gingtu taklou ahi a, anung in saptuam thusinsak pialsan in gindan leh paidan diklou pom hi. Saptuam a dinmun nei ahih ziak in saptuam mite bangzah hiam a thusinsak leh a pawl diklou ah pikawi zou hi.

Nikolpawlte’n numei-pasal kal a zalen tak a kipolhna leh milimbete’ ankuangluinate kihelna tel in khristian gamtat zalenna bukim zang uhi. A thusinsak uh Balaam thusinsak toh a kibang sim hi (Kilakna 2:14-15). Saptuam’ Pa Irenaeus in, “Nasepte bung 6 a kigen saptuam upa a tel a om, a min Nikolas gingtu taklou ahi a, anung in a thugin dik pialsan hi. Saptuam heutu khat ahih ziak in saptuam a mi khenkhat pikawi zou hi. Balaam bang in gitlouhna leh numei-pasal kal a thangtatna ah saptuam mi khenkhat a pilut” a chi hi. Aleksandar khua a Clement in, “Amau (Nikolpawlte) kelte (goats) bang in a noptat ua, nopsakna ding ahih nakleh thil khat peuh poisak a nei kei uh” a chi hi. Nikol pawlte sinsakna in Pathian’ hehpihna kaikawi in khristian zalenna ut bang bang a gamtatna phalna (license) in a kheng khia uhi.

Nikolpawlte’ gindan leh paidan bangteng hitaleh, eite chiamteh dia hoih ahihleh Ephesa saptuam in a lak ua om Nikolpawlte a huat uh ahi. Jesu Khrist in Nikolpawlte a huat bang a Ephesa saptuam in leng hiai pawl a huat sam ziak in Jesu Khrist in kipahpih in phat hi.

Tuhun in leng Nikolpawlte kichi minvuah saptuam ah om kei mah leh a gindan uh leh paidan uh koppih heutu leh gingtu om kha thei hi. Nikolpawlte toh kibang saptuam heutute’n amau ngaihdan leh thu kia dikpen leh hoihpen a ngai in midangte’ ngaihdan leh thu la ut bilbel lou uhi. Amau ngaihdan leh deihdan pompih loute melma a en in lam chiteng in soisa in gawtbawl uhi. Nikolpawlte toh kibang saptuam mite ahihleh Jesu Khrist gingta, hotdam leng hita kichi himahleh khawtang leh nekzonna mun leh nasep a diktatlouhna, numei-pasal kal a thangtatna leh nek leh dawn a leng poisak nei loute ahi uh.

Hiai bang mite’ gindan leh paidan saptuam in huat petmah a hua a mohpaih ding ahi. Hiai bang gindan leh paidan diklou nei mite mah leng a kisik nop kei uh leh saptuam in thunun ngam a, thununna a phattuam kei leh saptuam apan hawlkhiat lai ding ahi. Pathian it tak tak gingtute’n Laisiangthou thutak kaikawi sinsakna leh paidan diklou huat petmah in a hua uhi. Sam 139:21-22 ah Pathian’ lungtang bang pu David in, “Toupa aw, nang hawte ka haw kei a hia? Nangmah hong sualte tung ah ka lungkim a hia? Amau huat petmah in ka hua a; ka melmate in ka sep hi” a chi hi. Tanchin genna ding toh kisai a Pathian in a it bang a mikhial mangthangte saptuam in a it ding mah ahi, himahleh Pathian’ melmate leh gindan dikloute bel huat ding ahi. Saptuam in khelhna a huat zahzah a siangthou chih mangngilh kei ni.

KIDONG IN KIVEL NI

1.Tanchin Hoih Gen leh Nna hoih sep a phatuam ngai leh kuhkal tualsung saptuam i hi hia? A nuam leh awlsam hun chiang kia a phatuam ngai a sem lel a, a haksat hun a i nasepte niamkiak sak ahihkeileh tawpsan maimah i hi hia?

2. Pathian’ thugen khat peuh mawk pahtak pah gingtu leh saptuam makai i hi hia? Amah leh a thutawite Laisiangthou toh a kituak hia, kituak lou, adik hia dik lou? I en masa hia? I kep saptuam gindan diklou apan humbitna ding in a diklouhnate uh i phoukhe ngam in i mohpaih ngam hia?

3. Jesu Khrist gingta, hotdam hita kichi napi a, i omdan leh thilhih a Nikol Pawlte mah bang a zautat leh diktatlou i hi hia? Pathian’ itte it, Pathian’ huatte hua in Jesu Khrist a sianthou bang in i niteng hinkhua a siangthou hia?

Aban sutzop ding

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC