BYF, BDF, BCD Corner | KTZ

PERGAMOS SAPTUAM KIANG A LAIKHAK

Laisiangthou Pansan: Kilakna 2:12-17

Kha masa (October issue) a sutzopna –

T.13: Na tenna leh Setan mangtutphah omna leng ka thei hi; ka min kiptak in na lenden a, Setan tenna mun a ka palai ginom, Antipas thah a a omlai in leng na ginna na tawpsan tuan kei hi.

T.14: Himahleh demna zek kon nei, huailai a mi khenkhat Balaam sinsakna zuite na ompih ziak in, Israel tate ma a kipukna koih ding leh milimte kiang a kithoihna thilte ne ding leh kingaihna khelhna hih ding in aman tuh Balak a thuhilh hi.

T.15: Huchi bangmah in Nikolpawlte sinsakna zui, mi khenkhat mah na ompih hi.

III. JESU KHRIST IN PERGAMOS SAPTUAM A PHATNA (T.13)

Ze-etna nasatak a tuah lai a Amah (Jesu Khrist) adia a muanhuai ziak in Jesu Khrist in Pergamos saptuam phat hi. Hiai huna a tenna mun leh a thiltuah Jesu Khrist adia muanhuai louh theihna ding khop a nasalua himahleh Pergamos saptuam in Jesu Khrist kitheihmohbawl a taisan mai lou in Amah adi’n muanhuai hi.

A. A Tenna Mun

Pergamos saptuam tenna mun Setan’ Mangtutphah Omna ahi. “Setan Mangtutphah Omna” kichi, Setan’ thuneihkhumna leh vaihawmna mun chihna ahi a, hiai in Pergamos khawpi a teng mite’ gitlouhdan leh thaanghuaidan ataklang hi. Hiai bang khop a gilou leh thanghuai tuambiik hinkhua zang ginglou mite laka Jesu Khrist’ min (Jesu Khrist hihna leh A tatna Nasep) letkip thilbaihsam leh nuam hilou hial ding hinapi in Pergamos saptuam in Jesu Khrist’ min leenkip den hi.

B. A Thiltuah

Pergamos saptuam’ thiltuah ahihleh Jesu a gintak ziak a sawina ahi. Hiai sawina ah gingtu khat Antipas kichi thah in om hi. “Antipas” kichi avek a/ teng teng kalh (against all) chihna ahi a, khelhna leh thil hoihlou teng teng kalh chihna hiding ahi. Antipas Asia gambub a Rom kumpi sawina a martar masapen ahi. Thukhun Thak ah Antipas tanchin kigeenna dang a om louh ziak in amah tungtaang tamtak akithei kei. Saptuam thugousiah in martar a sih dan hiai a gen hi: Daal a bawl a sung hawm bawngtal lim meikuang a hul aam khat sung ah a hing in Antipas khum a om in a kaang gaw (Keu) sak uhi. Hiai bang in Jesu Khrist a ginna ziak in Antipas thah in a om hi. Rom kumpi sawina nasatak thuak in gingtu khat Antipas in Jesu Khrist a ginna sihpih hial mahleh Pergamos saptuam in Jesu Khrist a ginna uh tawpsan tuan lou in Amah adi’n a kuul leh si ding khop in muanhuai hi.

KIVEELNA DING

Niteng a khelhna leh thanghuaina punghat a uang sem semte’n Jesu Khrist’ saptuam teenna Setan mangtutphah omna mun ahi chih hon theisak hi. Pathian in khelhna a chihte ginglou mite’n khelhna chi lou hial uhi. Angkawmna khelhna Hilou chi in i gam a court sangpen in zan lam zek in thukhenna a nei hi. Hiai bang a Pathian kalh leh dou ginglou mite lak a khawsa leh nasem gingtute adia Jesu Khrist adia muanhuai a, Aman khelhna a chihte khelhna chihpih a, Amah dou bang a khelhna dou a Amah adia muanhuai hinkhua zat, thil baihsam leh nuam hilou hial hi. Hiai bang hun a khawsa gingtu nang leh kei bang i chi ua? Hiai bang hun-a Jesu Khrist adia i muanhuai zoh keileh hiai sang a nasa zaw sawina thuak leng Pergamos saptuam bang in i muanhuai zou diam? Sum-le-paai, thuneihna leh thilhihtheihna, dinmun leh hamphatna tam loute ma a Jesu Khrist adia muanhuai zou lou a, puuk pah beeibuui gingtu i hihleh i khalam dinmun ngaihtuah huai mahmah hiding ahi.

IV. JESU KHRIST IN PERGAMOS SAPTUAM A DEMNA (T.14-15)

Khelhna leh sawina nasatak lak ah Amah adia a muanhuai ziak in Jesu Khrist in Pergamos saptuam phat mahleh thil diklou nihte ziak in dem hi. Huai thil diklou nihte ahihleh:

A. Balaam Sinsakna (Tang 14)

Balaam’ Sinsakna zuipawl a kep ziak in Jesu Khrist in Pergamos saptuam dem hi. Balaam sinsakna Numbars bung 22-25 sung a thute apan kimu thei hi. Balaam zawlneitaklou ahi a, Moab kumpipa Balak in Israelte hamsiat ding in guai hi. Balaam in Israelte hamsiat a tup teng in hamsia hilou in, Pathian’ vualzawlna a kam apan suak khia zaw hi. Balaam in Israelte a hamsiat ding Pathian in phallou hi.

Himahleh, Balaam in Israelte hamsiat a tup tawp tuan lou hi. Huchi in, Moab leh Media numeite guai in Israel pasalte zol sak in numei-pasal kaal a khelhna leh a milim pathiante biakna ah pilut sak hi. Hiai Balaam’ thilguan diklou leh hiai khelhna nihte ziak in Israelte tung ah Pathian’ thangpaihna hong tung in asang-a sim in sihloh uhi.

Pergamos saptuam in Balaam’ sinsakna zuipawl a kep ziak in Jesu Khrist in dem hi. Peter in leng hiai bang a Balaam’ lampi zuite tungtang hiai a gen hi: “Mit angkawm a dim, khelhna tawpsan theiloute a nei ua, mi kiploute a khempuk ua, een hat lungsim a pu ua, hamse thuak tate ahi uhi. Boer’ tapa Balaam thilhih khelhna, loh deihpa lampi a tot ziak un lam dik paisan in a vakmang uhi.” (2 Peter 2:14-15).

KIVEELNA DING

Balaam’ thilhih diklou leh khelhna saptuam mite lak ah tuni in leng a om thei a, huaite ahihleh sa utna tokthou thei thu ngaihkhiat/sim leh milimte et (pornography), angkawmna, nungak leh tangval nupa bang a kipolhna (fornication), chihte leh adang dang. Tulai in leng gingtu mimal, tualsung saptuam leh saptuam pawlpi khenkhat hiai khelhnate poisalou, thuakzou leh atak a hiai khelhna a kizang a om uhi. Hiai khelhna hih dia khemna hat mahmah ahi ding a, saptuam nasem khenkhat natawm in leng daal zou lou uhi. Hiai khelhna hihte Pathian apan pimang a omte ahi ua, Israelte mah bang in segawp ding uh.

Tulai in mobile phone gingtute’n leng i nak zat mah mah ua, i tate uh naupang chik chik natawm deihsak in neilou sasa a leisak in i tawi sak uh. I tate’n mobile phone ah internet tawn in milim thaanghuai taktakte a en thei uh chih nu-le-pa tamtak in i thei kei uh. I lak a naupang chik chik kiteeng leh zawlgai tamtak omte hiai milim thaanghuai en ente pawl lak mite himai ding in a gintaakhuai hi. Balaam sinsakna apan gingtu mimal leh saptuam nasemte tan a kikepbit poimoh petmah hi.

B. Nikolpawlte Sinsakna Zui Mi Khenkhat Ompih (Tang 15)

Nikolpawlte’ sinsakna zui mi khenkhat omte ziak in Jesu’n Pergamos saptuam dem hi. June kha a Ephesas saptuam kiang a laikhak i sinna ah Nikolpawlte i genkhinta uh. Ephesa saptuam in Nikolpawlte thilhihte a huat ziak in Jesu Khrist in Ephesa saptuam paakta hi. Nikol pawlte kichite numei leh pasal kaal a thangtatte ahih ban ah a min uh, Nikol pawlte khiatna mipi zoute (Conqueror of the People) ahih bang in hiai pawl in saptuam mi vaantaangte thuneihna laksuh sak in thuneihkhum ua, saptuam pawl tamtak thuzoh in sinsakna diklou ah a pilut uhi. Nikol pawlte’ thugin leh paidaan mihing sa utna leh khalam a mi kisatheite adin thil deihhuai ahi kholdiak hi.

KIVEELNA DING

Nikolpawlte’ sinsakna leh paidaan tuni in saptuam khenkhat ah muh ding a om. Midang’ ngaihdan diklou vek a koih a, amah’ mimal ngaihdan leh deihdan kia paipih a, amah mimal ngaihdan lou peuhmah nei mite melma bawl a, gensia a doubawl a, a dinmun leh thuneihna huai bang mite gelgawtna a zang a, nengniam a, zahlak sak leh lohsap sak teitei tum saptuam heutute tuhun a Nikol pawlte toh a kilamdang kei uh. Hiai bang saptuam heutute Jesu Khrist’ palai ahi kei ua, Setan palaite ahi zaw uhi. Hiai bang saptuam heutute Jesu Khrist leh saptuam adia melma lianpen ahi ua, amaute apan saptuam veenbit gingtu mi chih mohpuak ahi.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC