Ordain Sunna | KTZ

Upa H. Hangzathang pen (L) H. Kamzakham leh (L) Nu Ngemkhongai-te nupa kal a ta masa pen ahi. Kum 1949 in Phaitong khua ah piang hi. 1964 in Pastor Lamgin khut apan ECC Phaitong Biakinn ah Baptisma tang hi. February 7, 1975 kum in Miss Tualdouniang d/o Laikhogin Tombing, Palkhuang tanu toh Pastor S. Thanglian khut ah Saptuam Dansiangthou in ECC Phaitong Biakinn ah kiteng uhi. Aman tapa 1 (khat) nei in tu pasal 2 (nih) nei hi.

Saptuam a kizatna tangpite:
ECC Phaitong saptuam ah 1978 a kipan in naupang sinsaktu in pang hi. Kum sawttak apan nung in 1984 apan ECC Thanlon District KTP Chairman in a na pang hi. Tua zoh in Local Committee ah pangtou den a, Local Secretary hihna leng sawttak len hi. 1994 ECC Kumsim khawmpilian Hiangtam Lamka ah Upa Ordination piak in om hi. 1993 apan 2005 sungteng EBC Thanlon Divison Working Committee member in a na pangzom a, a term 3na in EBC Thanlon Division Working Committee Chairman hihna len hi. BOT ah member hihna leng a na len khangei a huchiin a term 4na ah Thanlon Division Working Committee Vice-Chairman in a na pang hi. June 8, 2017 akipan in December 2017 tan EBCC Khominthang ah Chairman Building Committee in pang hi.

Khotang a kizatnate:
Amah mi phatuamngai mi chingkam leh mi polhnuam ahihna ah Phaitang khua ah chikmah in khotang ading in val ngeilou hi. PNC/PTC a heutu a pang den ahih ban ah Phaitong VA ah leng Secretary nna hun sawttak a na lentou hi. 2008 in Khominthang, New Lamka ah inn hong nei uh a, Phaitong leh Khominthang kawmtuah in khosa in hong om uhi. Tua sung in a khut leh a khe nuam salou in bah kisa a, huchiin June 3, 2018 ni in pawtsuah zou nawnlou in omden hi. Huai ziak in, Lamka leh Imphal a Doctor siamte ki-ensak in vialtai pih in om a, ahih hang in a natna giltak khuak Cancer (Brain tumor) muhkhiak ahih toh kiton in houpih theih nawnlouh in om ngal hi. Doctor advice-na toh innlum a kha nih sung vingveng kep leh don ahih nung in August 1, 2018 nitaklam dak 5:40pm vel in a nna a sep leh a muan Toupa kiang khawl tawldam ta hi.


Pastor T Vungkhansuan, June 10, 1966 in Vungbuk, Henglep Sub-Division, Churachandpur ah Upa T Ginkam leh (L) Kimkhoniang-te’ gil-a-gah goutan 5-te lak ah a nihna ahi. 12th January, 1989 kum in Dimhauching D/o Vunggin Gualnam toh Pastor S Jamchinpau khut ah Saptuam Dansiangthou in Vungbuk ECC ah kiteng uhi. Amau gil a gah goutan Pasal 1 leh numei 3 nei ua, tun amaute piching vekta uhi. Numei a upa pen in MA zou in tulel in Private Institution ah semlel hi.

Siamsinnna: Vungbuk Mission school ah 1973-1976 sung Class A leh B, Vungbuk Government Junior High School ah 1977-1983 sung class VIII tan, Vimala Raina High School, Churachandpur ah 1984-1986 sung Class IX leh X, Lamka College 1987-1991 ah PUC leh BA. Grace Bible College 2003-2006 sung in M. Div zil in zou hi.

Ordination leh Nasepna toh kisai: December 8, 1996, EBC Kumsim Khawmpi 48-na Bungmual ah Rev G Hatlang, Executive Secretary, EBC in Upa ding in ordain hi. December 6, 2009, EBC Kumsim Khawmpi 61-na Pethuel ah Rev L Kham Kho Lun, Gen. Secy., EBC in Pastor ding in ordain hi. Pathian nasepna toh kisai in Headmaster, CES Sinzawl 1991-1999. Headmaster, GES Mualnuam 1999-2010. Tua teng khit in Grace Bible College ah M.Div 2003 - 2006 sung sin a Best Academic Award ngah hi. Tua khit in EBCC Hebron New Lamak ah Local Pastor a sep masakna pen ding in 2010 sem hi. Pastor Posting 2 veina leh ahun tawpna tan Lamphelpat, Imphal ah sem hi.

A damlouhna toh kisai: Convention English School, Sinzawl a Headmaster a seplai - 1995, November kha in Diabetes nei dia kimuangmoh in om a, kum 1999 June kha a Mualnuam a aseplai in hong puksia hi. Huchia diabetes a ki-enkol a a omtouh lailai in 2013 kum in kal lam buaina nei in dialysis a khatveina bawl in RIMS ah hong om hi. Huai damlouhna ziak mah in Delhi ah leng sawt kuamtak va ki-enkol sak hi. 2014 apan in Home Dialysis pan a, huai kawmkawma in CMC Vellore ah leng va ki-enkol sak hi. Huai akipan in Imphal lam Diabetes toh kisai Doctor tuamtuam 6 pan in, atawpna pen Prof. Saratkumar Singh, MD. DM nuai ah ki-enkol lel in, nisim 18th July, 2018 zinglam dak 7:00 in stroke ziak in RIMS ah puaklut in om a, hoihlam himhim manoh theituan lou in, sunnung dak 1:20 in amuan leh a nna a sep Toupa kiang hon na zotsan ta hi.


Upa V. Vungzam, Pa (L) Envung Vualnam leh Nu Ningnian-te nupa gil a gah goutan naupang pen 1934 kum in Lungthul E khua ah piang hi. Aman pianpih sanggam pasal 4 nei hi. 1944 kum in Khristian na suak in Saptuam phutkhetute lak ah a pang hi. Pastor Kamkhogin khut ah Baptisma a na tang in Vungkhoning d/o Zamgin leh Pi Zenning-te tanu toh 1957 kum in Saptuam dan Siangthou in Pastor Khamzalian in na kiteng sak hi. Aman gil a gah goutan pasal 4 (li) leh Numei 1 (khat) nei hi.

1983 kum in Mawngzang khua ah pemlut a Saptuam phut khetu leh Makai in napang a, 1990 kum in Suangdoh khua ah na pemlut nawn in Saptuam/ Biakinn phutkhetu a pang in Suangdoh a a ten sung in Upa Ordination tang hi. Huan, khosakna ding ngaihtuahna in 2000 kum in Lungthul (T) khua ah pemlut nawn in, EBCC Biakin na phutkhenawn hi. A tenna khua peuh ah Local Chairman/Vice-Chairman in pangtou den hi. 2004 in Upa Pahtakna Lai sang hi.

February 2017 akipan in pawtkhe zou nawn taktak lou leh lupna tung ngak in omtou den a, July 26, 2018 in A nung a zuih a nna a sep Toupa kiang ah tawldam ding in hon na paisanta hi.

 


Page 1 of 7

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC