News & Updates - EBC

EBCC Jordan leh KBC B. Vengnom kithuahkhawmna

Chinsuanlal — Mon, 27 Jul 2026 08:10:23 +0000

EBC in “Khrist Nungzui Bawl Un” (Mt. 28:19) chih thupi sung ah July & August kha sung “Khrist nungzuihna tungtawn a kizopna kisiate bawlhoihna” kichi a tak a sepsuah ahih theihna ding in Local Saptuam tuamtuamte’n lam tuamtuam ah panla in kim-le-kiang a om, pau ki bat pih louh saptuamte lak ah Khrist a unau hihna puangzak uhi.
July 26, 2026, Nipini nitak in EBCC Jordan in Kuki Baptist Church (KBC) Central Church, B. Vengnom-te veh in kithuahkhawmna ‘Join Fellowship’ manphatak nei uhi. Hiai hun ah EBCC Jordan a kipan in Saptuam milip 250 vel kihel uh a, KBC saptuamte’n Upa Ordain leh Departmental head-te puansilhsakna nei uhi. Pastor H Thangbiaklal, Local Pastor, EBCC Jordan in thutak genna nei in KI-ITNA tungtawn a mite’n Jesu Nungzui i hihdan a hon theih ding ahi chih thugen hi.
Hun tawpna lamah KBC Pastor in a kuanlam leh inteek saptuam a kipan tangval 5, nungak 5, nupi 5 leh papi 5 chiat sam khia a, khut kileen in, ki it ding, pangkhawm ding leh unau khat hihna puankhiakna leh thumsakna nei in program zou uhi.

C3 Family Meet 2026

Chinsuanlal — Tue, 07 Jul 2026 10:31:58 +0000

Directorate of Development, EBC Headquarters etkaina nuai a Convention Child Care (C3), Hebron Study Centre in tuni 10:30 AM – 3:30 PM sung, Mini Auditorium, Gospel Centenary Hall ah “Family Meet Program – 2026 zang uhi. Hiai hun ah tulel a Hebron Study Centre in naupang a etkolte Nu-le-Pate paikhawm ua, hun masa ah Upa Dr. N. Thangkhansiam, NDPN Coordinator in “Inkuan kikepna leh Khalam hinkhua” chih thupi zang in sinsakna pia hi. Sunnung hun ah “Pathian deihdan Ta-le-Nau kepna chih thupi zang in Upa Dr. N Thangkhansiam mah in sinsakna a piak banah Inkuan vai leh ta-le-nau kepna a haksatna leh buaina omtheite kikupkhawmna leh panlakna ding lampi om thei bangbang kikawkmuhna hun zang uhi.
Hebron Study Centre in tulel in naupang, siamsinna leh kikepna vai a haksatna tuamtuam nei 57 enkol a, Seppatni akipan Sintawpni nitaklam school kaitawp teng in naupangte siamsinna leh khalam a a poimoh bangbang uh panpihna pia uhi.

Disciple-Makers' Training

Chinsuanlal — Tue, 07 Jul 2026 10:26:38 +0000

Directorate of Ministries nuai a Discipleship Coordinator makaih in July 6, 2026 - August 01, 2026, sung Fellowship Hall, Dorcas Hall ah Disciple-Makers’ Training neih hiding hi. Hiai hun ah Local Saptuamte’n hiai na semthei ding chi a palai a sawl uh mi 40 vel kihel in Rev. M. Zalian Guite, Director of Ministries in training honna leh Pathian khut a kikepsakna hun zang hi. Training hun sung a Sinsaktu leh a sinsak ding uh thupite hiai bang ahi.

Rev. K. Kamchinkhup “Biblical and Practical Importance of the Local Church in
Disciple-Making”
Rev. M. Zalian Guite “Honouring Pastoral Leadership; Communication, Submission,
and Trustbuilding”
Rev. Nenglian Vualnam “Handling Tension, Misunderstanding, or Differences in
Ministry Culture within Local Church Settings”
Rev. M. Ginminthang “Identifying Faithful, Available, Teachable People”
Pastor H. Biakson “Disciple-Making in Partnership with the Local Church”
Pastor Dr. T. Tunson “Building Collaborative Ministry Structures and Teams within
Local Churches.
Pastor L. Siamlalmuan
Pastor G. Pauzarual “The Master Plan of Jesus”
Upa Dr. N. Thangkhansiam “1. Relational Evangelism; Identifying Persons of
Peace; Starting Spiritual Conversations. 2. Handling Common Responses and Objections
with Grace and Truth. 3. Coaching, Accountability, and Simple Reproducible Tools”
Mr. Thiankhankhual Hanghal 1. Understanding the Gospel Clearly; how to share
personal Testimony; Barriers to Witness. 2. Follow-up after first contact; helping
seekers move toward faith and obedience.
Evan. N. Langchinthang “The heart of the evangelist and the mission of God”
Rev. Chinkhengoupau Buansing

AC leh LED Screen zattheih ding a lat in om

Chinsuanlal — Fri, 03 Jul 2026 09:31:28 +0000

Gospel Centenary Hall, New Lamka ah Air Conditioning System leh LED Screen (12x22) hun bangtanhiam apan installation nasep ahihnung in tuni sun dak 12:00 in Rev. K. Kamchinkhup, General Secretary in Pathian kiang ah latna nei hi.
Tua toh kiton in program tuamtuam zatna hunte ah system thakte a zatman bikhiah kibawl bangbang pia in zattheih ta ding hi.

Orders

Chinsuanlal — Fri, 03 Jul 2026 09:18:44 +0000

Pastor Lakna - 2026 a candidate interview process a omlel “Sawltak” hihna toh kizang mi 4 te’n Tualsung saptuam a nasepna experience leh training (Pastoral exposure to Local Church, Phase-I) ding in General Secretary phasakna toh July 04, 2026 - October 31, 2026 sung Pastorte nuai a tualsung saptuam a kisin ding in assignment piak ahi uh:

Suansang Naulak: EBCC Vaal Veng
Zamzagin Tunglut: EBCC Zenhang Lamka
Mungsonlian Shoute: EBCC Pearsonmun
H. Zamsuankham: EBCC Vengnuam

Chiamteh dingte:
1. July 04, 2026 tan in Director of Ministries ah Superivisor leh Divisional Superintendent tawn in Joining Report pia in asempan ding uhi.
2. Pastorte Monthly Report Form Office a la in, khabei teng a copy nih fill up in, khat Concerned DS ah leh khat Director of Ministries kiang ah apelut zel ding uhi.
3. Sawltakte omna ding toh kisai Tualsung Saptuam mohpuak a koih ahi. Banghiam poimoh a omleh Director (Mn) toh kithuzak a sai ahi ding.
4. Pastoral Exposure sung a akisin ding ua deih, asepsuah ding uh leh sepsuah ding dan uh taklatna pektuam a attached ahi.

Lohching leh gahsuahtak a sem buching thei ding in Sawltakte leh Supervisorte Toupa’n ompih chiat hen.

Sd/- Rev. M. Zalian Guite
Director of Ministries

CEF (TCE) level 1 training Certificate piakkhiatna nei

Chinsuanlal — Fri, 26 Jun 2026 12:53:20 +0000

Directorate of Ministries, EBC nuai a Baptist Children Department in Tuni (26th June 2026) nitaklam 03:00 PM in Dorcas Jubillee Guest House ah apaita June 9-14, 2025 a Child Evangelism Fellowship (CEF) toh pangkhawm a “Teaching Children Effectively Level 1” (TCE Level 1) training a neih na ua training requirements (Theory & Practical) tengteng zou a centificate ngah thei ding a chinna nei mi 16 te kiang ah certificate piakkhiatna nei uhi.
Hiai hun ah training a tel mi 25 te lakah certificate ngah thei ding a chinna nei mi 16 te kiang ah Rev. M. Zalian Guite, Director of Ministries in certificate piakkhiatna leh amaute adia thumsakna nei hi.

Saptuamte Thumna

Chinsuanlal — Fri, 26 Jun 2026 08:58:34 +0000

Tulai India gamsung a thiltung tuamtuamte lakah a diak in Khristian Biakna leh nasepna sukha FCRA Bill 2026 toh kisai naktak a awlmohna toh Evangelical Fellowship of India (EFI) in June 28, 2026 (Pathianni) a saptuamte’n thumna hun khat zang ding in ngetna hon bawl uhi. EBC leng EFI nuai a member khat i hihna toh ngai poimoh in Saptuam Nipoimoh toh kisukha himahleh zing biakna kikhop/nitak mahni lemtan penpen a EFI in anuai a thumna makai ding hon piakte uh pansan a mipi’n thumkhawmna hun khat a na zang ding a theihsakna a na bawlsawn chiat ding in General Secretary deihna bang in i kizasak hi.

I gam India a ding in, mipite palai MP/MLA/MDC te a ding in; vaihawmsiamna, pilna, diktatna, khentuam omlou a thutanna dik, leh gamsung dan zuihna diktak a om theihna ding in.
Gingtute’n lungmuangtak a Pathian bia a, tanchin hoih gen zalentak a gentheih na ding, mipite a ding a na hoih septheih zel na ding in.
Mipi a ding a na hoih sepna lam tuamtuamte; siamsiamna (education), damtheihna (healthcare), panpihna (relief), khantouhna (development) leh thilpiak (charitable institution) tuamtuamte a ding in.
Khristian heutu tuamtuamte kikal ah pankhawmna dettak (unity), pilna, leh thudik khentatsiamna a omna ding in; mi nam tuamtuamte kikal a lemna leh kithutuak a sepkhawmna om theihna ding in.

Sd./
REV. M ZALIAN GUITE
Director of Ministries, EBC

DOWNLOAD PDF

Mission Inn Boy's Dormitory Honna

Chinsuanlal — Thu, 25 Jun 2026 17:48:25 +0000

Directorate of Missions, EBC HQ. saina in tusun (June 25, 2026) 12:00 in Khominthang a Mission Inn huangsung ah NDPN Boys Dormitory thak honna leh latna program zat in om hi. Program pitu in Rev. Thawndoulian, Director of Missions pang a, Rev. K. Kamchinkhup, General Secretary in Boys dormitory thak honna leh latna nei hi.
NDPN (Nekzonna Dohkan Pulpit Nasepna) ahih leh Missions nasepna paidan ngeina a lut theihlouhna munte ah leng tanchinhoih puaklut a a-om theihna ding a tuailai kisinsiamna tuamtuam sin a, huai tungtawn a Tanchinhoih puanzak ding lunggulh a neite kisakkholhna munpi ahi. Tulel in Mission Inn, Khominthang ah tua bang mi 16 om lel a, building thak kihon toh kiton in lunglutna nei mi 16 mah ombeh thei ding hi.

Kum 70 tunglamte Fellowship

Chinsuanlal — Thu, 25 Jun 2026 15:46:02 +0000

Lamka West Division Baptist Dorcas Committee saina in tuni (June 25, 2026) 10:30 AM – 03:00 PM sung, EBCC Bethany, Zoar Veng, Bungmual ah Kum 70 tunglam Fellowship 2026 hun zat in om hi. Hiai hun ah Division sung a kipan kum 70 tunglam 280 vel paikhawm ua, Fellowship pitu in Rev. Dr. S Vung Minthang pang in Rev. N. Pumsuanmung, DS/LWD in paikhawmte adia thumsakna hun zang hi.

Lamka South Division DS Quarter thak honna leh latna

Chinsuanlal — Wed, 24 Jun 2026 13:21:27 +0000

Lamka South Division in tuni (June 24, 2026) zingkal dak 7:30 AM in Mata khua a Division Office huangsung ah Divisional Superintendent (DS) Quarter thak honna leh latna program nei uhi. Hiai hun ah Division sung akipan DEC & Division Committee tuamtuamte, office Staff-te leh Pastor-te, Dorcas Hall akipan General Secretary, Director te, Division tuamtuam akipan DS leh DEC Chairman-te banah EBCC Mata saptuam heutute paikhawm in Upa H. Pumzasuan, Chairman DEC/LSD in DS Quarter thak honna nei a, Rev. M. Zalian Guite, Director of Ministries in Pathian kiang ah latna nei hi. Program hun ah Director te’n thugenna hun zang in EBC Division tuamtuam akipan kipahpihna thilpiak piakna nei uhi.
Divisional Superintendent Rev. T. Thangzasiam in a genna ah DS Quarter bawlna nasep October 17, 2025 in EsEs Construction te toh work agreement suaikaih hi a, October 20 a nasep pat a om in April 31, 2026 a zohsiang in om hi.
Toupa’n Division sung a Local Saptuamte toh kichimattak a nasepna mun hiding in hon vualzawl sak hen!

Launching of Mission Leipi

Chinsuanlal — Fri, 19 Jun 2026 13:40:41 +0000

June 19, 2026 zing dak 7:00 in Mini Auditorium, Gospel Centenary Hall ah EBC Missions Department nuai a “Mission Leipi” kichi honkhiakna program poimohtak zat in om hi. Hiai hun ah Central Missions Sub-Committee (CMSC) member te banah EBC Division tuamtuam akipan Division Missions Committee (DBMC) member te leh Convention Executive (CEC) Member te paikhawm in Rev. L Khaikhansong, Member CMSC in patna thumna nei a, Rev. M Ginminthang in phatkhawmna makaih hi. Rev. Thawndoulian, Director of Missions in vaidawnna leh pulakna nei a “Mission Leipi” patkhiatna (launching) ahih leh Rev. K Kamchinkhup, General Secretary in nei a, tuate zoh in Rev. M. Zalian Guite, Director of Ministries in hunkhakna nei hi.

“Leipi” kichi singtang lou nasepna toh kisai a thumal kizang hi a, louzaupi neikawm a, a nai zaw deuh a lou lianlou, haichi tuamtuam tuh a baihlam tak a kuantheih na pen “leipi” kichi hi. Tua mah bang in “Mission Leipi” i chih leng i kim-le-kiang a hong khosa gingloumite, a diak in vaite lak a tanchinhoih nasepna hiding hi. Hiai nasepna a ma hon lakpih ding in Odisha akipan Evan. Pritison Limma lak in om a, tuzing mah in General Secretary tungtawn in nagotna (commissioning) piak in om hi.

Biakna Labupi

Chinsuanlal — Fri, 19 Jun 2026 13:38:07 +0000

“Biakna labupi” First edition 2024 hard copy zohkhiat ahihnung in tu in Android, iOS, Windows leh Mac tungtawn a baihlam tak a zattheih ding in Apps. leh Software (Biakna Labupi) bawlkhiat ahi.
Kuapeuh in manphatak a i zattheih chiat ding uh deih leh lamen in General Secretary lemsakpihna toh Google Play, Appstore leh EBC Website apan download theih ding in koihkhiak hita hi.