Articles | KTZ | EBC

TOUPA TUNG A KIPAHTHU GENNA

Tu kum louma leh huanhaite tungtawn a ‘Toupa tung a kipahthu genna’ nei thei a i om manpha sa in kipahna chibai ka honbuk hi. Hiai hun ah mi chih in kipahna dan theihna toh kisai Laisiangthou hon sinsak dan leh i hihna velthak le uthuai i sa hi. Pathian thupiak ngaihtuah het lou a kipahthu gen sangsik a vuina, khasiatna, vual-enna leh kingaihsiatna toh khosa nilouh i hih ding thil lauhuai ahi. A zuau ngeilou Laisiangthou in- “Nuam gige un… Bangkim ah kipahthu gen gige un…” (1Thes. 5:16,18a) a chih in bang hun peuh leh thiltung khatpeuh huam leh gingtute dia thil hithei ahih ziak ahi.

Kipahthu Genna Ni Kipatdan:

Khovel zelsuak “Kipahthu Genna Ni” kum 400 phial paita-a hong kipat dan saulou i en ding. Kum 1620 in Church of England-te’ gindan a lungkim lou mi 100 val in a gam uh taisan in Atlantic Tuisuahgiat kantan in Massachussets State (USA) ah na galkai uhi. Haichi kiningching a pawi zoh ma un nek thulim louh ziak a natna (cholera) in a kimkhat mahmah si uhi. A kum nawn 1621 in a gammi (Red Indians) ten vaimim leh haichi dangte chiindan ban ah ngamat dan chihte sinsak uhi. Huai kum in vaimim, barley buh, be, mai leh haichi tamtak hon kaikhawm theita uhi. Kipahthu genna ‘Pawi’ bawl in a gammite’ hausapu leh midang 90 chial uhi. A gam un zalenna hon muh in Vaihawmpawl (Congress) in ‘Nampi Kipahthu Gen Ni’ neih poimoh sa ua, huai ding in George Washington in November 26 na bil-at pih hi. America’ Tual Gal bei 1863 in Abraham Lincoln in November kha a Ningani nanung pen hiai ding in sehkhiak pih nawn hi. 1941 in Khistmas kisakkholhna dia hun kidaihzaw deih ziak in Franklin D. Roosevelt in nipikal khat a kainai in ‘Kipahthu genna Ni’ dia November 4 zat di’n thusuah hon bawl hi.

Tuni’n a ‘ni’ leh a ‘ziak’ te kibang vek kei mahleh Pathian tung a kipahna dan thei a ‘Kipahthu Genna Hun’ sehtuam neih thil manpha ahi. Khovel khantouhna thupi in ‘Nuclear Age,’ ‘Computer Age’ a om kichi mah le’ng khosakna kikhek nailou, thagum-thatang a nek mu tamtak om lai i hihdan phawk ding ahi.

Kipahthu Genna Dingte:

Laisiangthou in kipahnadan theih ding hon thupiak ahi [“Kipahna dan leng thei un”-Kol. 3:15]. Kipahnadan theih tuh lungtang deihlam muhna a chilai hi [“Toupa tung ah leng kipak in; huchiin na lungtang deihlamte a hon pe ding hi”-Sam 37:4]. Huai kawmkal ah ‘kipahnadan theiloute’ tuh hun nanung a siatna tuntu dingte lak a simtel in om uhi [“Mahni ki-itte, dangka deihtate, ki-uangsakte, kisatheite, Pathian gensete, nu leh pa’ thumangloute, kipahna dan theiloute” - 2Tim.3:2]. Mahni hinkhua a Pathian hoihna, zahngaihna sut a kipahthu genna uangbawl ding i biak Pathian’ deihlam ahi:

1. Nekzonna Ah: Paul in a nasep ah Pathian hihna theichian mahmah in, “Ke’n ka suan a, Apollos in tui in a vak a, himahleh Pathian in a khangsak hi. Huchi in a khangsakpa Pathian kia loungal, a suanpa lah bangmah ahi kei a, tui a vakpa leng bangmah ahi tuankei…” a chi hi. [1Kor. 3:6,7]. Mihing hihtheih tawmdan leh Pathian poimohdan taklang hi. A ngaihtuahtham mahmah tuh lei keugaw lak a haichi tang i va khiakte leitang khauhtak phukham zou thahatna toh hong pou uhi. Huchi a thahat awlchik in sukha le kitan ngal zah a hatna nei lou hizel uhi. Haichite poukhiakna, khankhiakna, gahsuahna leh bitna ding mihing hihtheihna khenlam, Pathian a kinga liuliau ahi. Ngaihtuah sau lou hial a ‘ka khou a, ka sem a, ka zong a nei ka hi ve’ chih phenphan khak thil lauhuai lua ahi. Kumpi David in “Lei na veh a, tui in na khai a, nakpi petmah in na hih hoih hi; Pathian lui tui in a dim a: lei huchibang a na bawl nung in amau ading in buh na bawlsak hi” a chi hi [Sam 65:9]. Pathian ziak lel ahihman in min hoih khuksak thasial hetlouh ding ahi. Israelten biakna a limsak louh ziak ua Pathian gawtna vanzat- ‘Keuna,’ ‘Apna,’ ‘Singnget lung’ chihte louma a lopsapna tuntute ahi uh. Tulai in Manipur leh Mizoram in lung chikhat, “Fall Armyworm” kichi buaipih mahmah hi. [Sangai Express, May 24, 2019 ah- “Vaimim tampi mahmah hihsetu Fall Armyworm thunun zoh ahihtak dan, Damdoi (pesticides) kapna khua 750 a neih ahihtak thu leh State solkal in buh chiin kipatma a hiai lungnou hihchimit dia theihtawp suah ahih thu gen hi]. Pathian a lungkim kei leh kial bawltu di haulua ahi chih kitheihmohbawl kei ni. Lungnou leltak leng solkal sikkhop suah thei hi.

2. Inten-louten Ah: Tanchinhoih i muh hun leh tu hun a khawsakna tong-le-lam a kikhia ahita. Tangthupha ziak a kikhekna in hamphatna leh tawldamna thupi hontut [a kholdiak in numeite hinkhua ah] muh ding tampi om hi. [Huai’ lai a numeite ni khat hun zatdan: Zing nna- khovak ma a thou, mei-am omsun mutkuang, anhuan kawm a ansu, luikhuk a tuitawi, neksai. Sun nna- vaikuan (tuithawl leh vanzat teng pua), nasep ma a singtom, nna sem charchar, paikuan a meh di kaikhawm, singkhuah leh meh di seng dimteek a pua. Nitak nna- khaukhek, vok-an huan; nungak chethei deuhte tangvalten zan sawtpi tan tutpih, hiai in thoh-hak phalna pe diaklou…!] Tuchiang in ansuk, tuitawi, singpuak chihte numei’ nna hikha nawnlou, puan le khut a sawp nawn lou hiphialta. Hiai kouzanna bang chi’n i zang ua chih ngaihtuah tham ahi [Ets. Tate leh insung puahna’n; Laisiangthou simna leh thumna’n; Damlou leh lusun te vehna’n hia? Ahihkei leh Summet zonna’n; Kholak vakna’n; 2nd hand sinna’n; TV etna’n; Mobile mekna’n; Tawldamna in?]. Tha-awl hiaihiai alah zingthoh haksa hiaihiai zawsop? Masawnna leh kikhekna i hamphatpih omte ah kipahthu i gen sek uam? [Tuchiang in bi-inn a teng kitawm mahmah ta ding hi. Vuahzuk teng a lupna tung hep, bitsak sawm a intung dawtdawt thil nuamchiam hilou hi!]. Jesu’n, Pharisai Simon kiang ah “tampi ngaihdam a om in nakpi’n a it” a chi hi [Luk.7:47]. Tampi a hon kouzangsak Pathian’ tung ah kipahna bangchi’n i taklang ua le?

3. Hihna Bangbang Ah: Hihna bangbang a kipahthu gen ding Laisiangthou hon thupiak ahi. “Bangkim ah kipahthu gen gige un” [1Thes. 5:18a]. Hiai in a tunkhakte lak a tamlou en ni:

3.1. Gentheihna – Hiai tuh khovel omsung daih ding a Pathian seh ahi. “Huai gam ah lah gentheite om louh lai a om sin ngal kei a” [Diu.15:11]. Jesu’n, “Mi gentheite na kiang ua om gige ahi ua…” a chi [Joh. 12:8]. Pathian in ‘om gige’ dia a chihte lak a telkha hih ziak a kingaihsiat sang in kipahthu gen hoihzaw ding hi. Huan, a neizaw dia hamphatna tangte’n gentheite i sai dan Pathian’ thupiak zuih leh zuih louh tehna (tester) ahih phawk ding ahi.

3.2. Hauhsakna - Hauhna leh lohchinnate Pathian apan hamphatna ahihlai in dinmun pilvanhuai leng ahi. “Mihausa Pathian gam a lut sang in sangawngsau phim bil alut paisuak a baihlam zaw…” [Mk. 10:25]. Hauhna tuh khelhna hilou in, zatkhelh leh Pathian sang mah a buaipih leh muanzawk a baihlam ziak a dem leh soiselna om sek ahizaw. Paul in Timothy kiang ah- “Hiai khovel a mihausate kisathei lou ding leh sum muanhuai lou a muanna ngalou a, thil tengteng kipahna ding a tampi a hon pepa Pathian a ngazaw ding in hilh in” [1Tim.6:17] a chi hi. Kumpipa Solomon in – “Ni nuai a gilou hoih hetlou ka muh a om a, huai tuh, hauhsakna a neipa’n amah siatna dia a kep: Himahleh huai hauhsaknate thuakna gilou in a mangthang hi; tapa a suan leh a khut ah bangmah a om kei” a chi.

3.3. Zawngkhalna – Pathian in china thei leh sih hun nei dia honbawl i hi. Jesu’ itpa Lazar leng a china phet hilou in si hi. A sanggamnu ten Jesu kiang a, “Ngai dih Toupa, na it a china hi” chih hilh ding mi sawl uhi [Joh.11:3]. Khelhna ziak a chinat, piansual hipah lou in Pathian lemgel om hi. Jesu’n mittawsa a piangpa’ tungthu ah, “Hiai mi’n thil a hihkhial kei, a nu leh pa’n leng a hihkhial kei uh; Pathian nasepte a tung a a latna ding ahi zaw” a chi [Joh.9:3]. Taksa damlouhna kia hilou in lungsim pilna, felna, pianken leh mel-le-puam a zawngkhal kisa i om tham ding. Pathian’ hon sehna pom leh kipahthu gen i mohpuak ahi.

Thukhitna:
Pathian thu leh Amah theihpihna tellou a i thuak bangmah omlou ahi [Toupa’n thu a piaklouh in, hichi a hong hi, chi kua ahia? Tungnung Pen kam a kipan in hoihlou leh hoih a hong pai kei maw? Kah. 3:37,38]. Laisiangthou in bangkim a kipahthu gen ding a chih zui peuhmah le’ng a nungzuitu ding Pathian mohpuak om hi [Toupa’ tung ah leng kipak in; huchi in na lungtang deihlamte a honpe ding hi” Sam 37:4]. Tu kum vuahzuk ginat louh solkal in leng a patauhpih ahita. North East state-te ah Meghalaya leh Assam chihlouh vuahtui muh dia lamet zah muzou lou, kial tun ding patauhhuai sa ahi uhi. Bangkim Pathian khut a om, inma-louma a vualzawlna i don tengteng Amah a hong kipan vek ahihdan phawk a, kipahna dan theih leh kipahthu gen chilbawl louh tuh gingtu diktakte hihna ding ahi. Huai bang gingtu hithei ding in simtute Pathian in hon vualzawl chiat hen aw.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia