Articles | KTZ | EBC

LAISIANGTHOU, PATHIAN AW HINPIH A PATHIAN POMTAK BIAK PIAKNA

Thumasa a ‘Pomtak Hinna’

Laisiangthou ah Pathian ‘pomtak’ mun tampi leh hun tampi ah genna leh sinsakna piak in a om hi. Thukhunlui apan in Pathian in A mi Israelte kiang ah a gen tam mahmahte lak a khat ahi hi. Hiai thu ah Pathian in ‘a pomtak biakna’ Thupiak 10te lak a a masapen; “Kei lou Pathian dang himhim na nei ding uh ahi kei,’ chih ana gen hi (Diuteronomi 5:7). Aziak ahihleh Pathian leh biakna kizopna poimohtak ana om a, mi khatpeuh in a biak pathian kiang ah a pomtak biakna a piak ding ahi. Hiai toh kizui mah in pathian tuamtuam neite’n leng a pathian uh kiang chiat ah a pomtak biakna a lat uh kisam hi. Tua thu a kitel semna ding in Thukhunlui hun in Pathian (Jehovah) in Kei lou Pathian dang himhim na nei ding uh ahi kei chi hi. Khovel a mi tampiten a pathian uh a nei chiat uh. Tua biakna tampi (multi- religions) omna ah koipen biakna piak ding chih mi tampite a ding a buaina ahi lai hi. Hiai thu toh kisai in tua i thupi gen ding uh “Pathian thu hinpih a pomtak biak piakna” hiai anuai a bang in khenna nei in gen leng a kitel theih deuh ka lamen hi.

Pathian Thu Laisiangthou a om thu: Pathian Thu Laisiangthou sung ah buchingtak in piak in i om a Thukhunlui ah bu 39 om in Thukhunthak ah bu 27 om a avek in bu 66 apha hi. Hiai Laibu Pathian apan ahi a, bangmah dang in khek theilou in a zattak Thukhun ahi. Hiai Thuhing pen Pathian leh ei kikal a Thukhun ahi hi. Thildang tampi theihtuak leh theih ding tampi om mahleh Pathian mite ading in Pathian in hiai thute ana pia a tua pen a kikheng ngei lou, a kikheng lou ding leh tangtawn a om den ding ahi. Toupa Jesu’n hiai thu sutvom khat lel leng a mang kei ding chi hi (Mathai 5:18).

Pathian Thu-a hing a a pomtak Biakna: Pathian hing biakna i chih chiang in thil khat alou-theilou Amah Pathian biakna teng a ahi ngeingei ding a om hi. Tua pen Pathian ‘Ginna’ a hinna leh ginna a kihih thilte kia pomtak hi. Pathian thu zang a ginna tellou chih a om thei dia hia? i chi ahi maithei. I Toupa Jesu’n khemna a tuah lai in Setan in Pathian thutak ngen zang in a khem. (Mathai 4:3,6,9). Mi khenkhatten Pa thu ahi bang a gingta hetlou lah pauna teng a zat pen in a nei ua tua pen Pathian pomtak a Pathian Thu zatna hilou hi. Pathian thu pomtak biakna a zang in a gen bangbang a thei a, hinna a neih a, gamtatna a zatkhiakna ahi. Pathian thu deihdan a kaihkawi mai hilou in, gen dia i deih gensak a paipih hilou in ahi bangbang a zatna ahi. Toupa Jesu’n Pharisaite leh Laigelh mite kiang ah hiai bang in a gen tuantuan- ‘Hichi a kichi na zata uh... hichi a kigen na zata uh… hichi a kigen na zata uh... ken bel hichi in ka chi ahi chi hi, (Mathai 5:21. 27, 31, 33, 38 leh 41). Hiai ah i Toupa Jesu’n tua hunlai a Dan (Laisiangthou) tualai a Dan siam, Laisiangthou siam kichiten amau deihdan in Pathian Dan Thu a kaikawi ua; amau hinna toh kituak ding in a hinna uh a zuisak ua, amau a hinna in Pathian Thu a zui kei uh. Tua pen amau hinna toh kituak ding a Pathian thu kaihkawina ahi hi. Biakna pomtak ahi thei diam? Laisiangthou ah a pomtak leh a pomtak lou thillat a gen Genesis 4:2-5 ah i mu hi. Abel leh Kaina thillat ah Pathian pomtak leh pomtak louh i mu hi. A laantu hihna leh lungsim puak in Pathian pomtak leh pomtak lou akhen hi. Kaina lungsim dik lou mah ahi dia tualthahna tanpha a tun hi. A lungsim dik lebel a thillat leng dik leh pomtak laan khinta ding hi. Laisiangthou a Pathian ma-a siamtanna ding hotdamna tanpha ah ‘Ginna’ lou in kuamah in siam a tang kei a, kithoihna gan sisante, Dan zuih buchinnate in leng siam a tan kei chih chiantak in sinsakna piak ahi. Paul in Thukhunthak lai a siamtanna a genchetna chiang mahmah hi. Aman ‘Abraham in zek a sum ma a siam tang hia? zek a sum nung in? chih dotna a bawl a, amahmah in dawng in Abraham in ‘zek a sum ma in siam a tang khin a, a ‘ginna’ tuh diktatna a seh ahi a chi hi. Mi khenkhatten ngaihzawn thu in Jesu sisan kia a siamtanna om ahihman Kaina thillat a sisan tel lou ahih man a pom tak hilou chiin gen thei uhi. Kilawmpi abang a himahleh genchetna hoih pen ahi khol kei ding. Kaina thillat amah sepkhiak apan ahi a, ganvul mi ahih louh man in Pathian in sisan a phut khol kei ding. Laisiangthou in “Ginna a thillat leh ginna tellou thillat ahih ziak a kibang lou ahi chih teltak in a gen (Hebrute 11:4). Abel in ginna nei in bangkim petu Pathian kiang ah a gan vulhte lak a ‘gah masa pen leh ahoihpen (a thau) te a laan hi’. Tua in Abel in Pathian ginna in aban ah leng Pathian in pe thei ahi chih gingta in it leh sit nei lou in ahoih (thau) pente mah pia hi (Genesis 4:4). Kaina in bel a haichi piangkhia khenkhat a laan a chi lel a, ginna in Pathian kiang ah thil a laan kei a, ahoihpen leng laan lou in ginna tasam deuh hiding ahi hi. Hiai ah thillatte pen bangthil hihta mah leh a laantu hihna hiam Pathian toh kizopna mah a poimoh gige hi (1Johan 3:12). Ei gamsung et in Pathian gam nasepna a thillat miteng in a ut huai thil leh a kilawm hih ding a suak simta abang, a kipahhuai lam ahi peuhmah hi. Ahihhang in, thillatna nei ding a a chialtu leh Pathian kal felloupi a a thil uh va mawk lat lat pen thilhih tuak ahi diam chih ngaihsut huai mahmah hi.

Pathian Thu hihna: Pathian Thu hihna ‘hing leh thilhih thei; naamsau langnih a hiam, bang a gen ahi a, mihing guh leh guhngek kikhen hilhel khop a sun pailet thei ahi (Hebrute 4:12)). Galvan buching (Ephesate 6:10-17), Lampi a vaakna (Sam 119:105) ahi hi. Tua thu pen Pathian aw hi in, tua mah hinpih a, hinna a bangkim ding a zattheih ahi hi. Pathian thu a hing i chih chian Pathian in a thu a a gente zui a, hinna a zang a tuabang a hinngamna ahi. Tua thu pen hoihlua, kilawmlua leh midangte ading a leng hinna manpha pekhia hinna ahihman in mi Pathian hing theiloute tanpha inleng deih in kipahpih tampi om uhi. India pa chih a om Mahatma Gandhi bang in a thugen leh hinna ah tampi Pathian thu mah toh kibang a zang hi. Ahihhang’ tua hinna hoih a zuih pen ‘ginna’ a suak ahih keileh Pathian pomtak hi tuan lou hi. ‘Pathian thu a hing’ i chih chian’ Pathian toh kizopna ahi a, amah a hinna neilou mite ading in tua a hinna bulphuh a gamtatna a latsak hitheilou ahi hi.

Pathian Thu hinna a zatlouh -pomtak lou leh gahsuah lou. I gensa teng ah Pathian thu mi tampiten hoihsa in a hinna uah leng a zang om tham uhi. Hiai i gen chiang in, ginna omlou in min a zang hiam a deih thei ding ua hia chih i dong ahi maithei. Tulai in Pathian mi kichi tampite gamtatna leh hihdan i etchia’n Pathian ginna ziak a suak hilou hileh kilawm tampi a om thei ding hi. Etsakna ding in– inn hoih pipi leh thil hoihpi mantampite sum muhdan dik lou pi leh mulkimhuai simpi a mu a, tuate neihkhit chiang a Pathian kiang a lat, chihte; thu siamtak a gen, la siamtak sa-a kizepna (uniform) hoihtak leh mantam takte toh lasakna, chihte in eimah kipahtawina ding a hihleh thillaan i hih hiam– mihing mai-etna ngim a Pathian leng phawk khalou thillat om thei tham ahi. Thil himhim mipi mai a kilawm leh siamtak hih mite ut leh tup pen ahinak, ahihhang’ amau kilawmna siamna pulakna lel thillat in Pathian pomtak a suaksak kei. Lasa siamten la hon sa ua, a kizepna uh puante, a aw hoih leh ging kilawmte en leh ngaikhia in a tawp in khut beng in i awng zuazua leng mihingte mah kipahtawi tuah i hi thei lel uhi. Toupa Jesu’n tua bang miten a kipahman uh a mu khinta uh, chi hi. Amerika a pawlpi lian mahmah khat ah Japan mi ka lawmte un hon va kikhoppih hi. Lasa pawl (choir) te lasak siam mahmah uhi. Mipiten khut kibeng zuazua hi. Pastor-pa hong ding a ‘kou biak Pathian ahihman in mi lasa siamte kipahpihna in khut ka beng kei uh’ chi hi. Tua khit zaw mi khut beng om nawnlou in kidai dide mah hi. Saptuam khenkhat ah belam chingtu Pastorte’n tua bang mihing kipahtawina hi-a kilang thilte a phal kei uhi. Mite muh a kilawm deih ziak a thillat– inn thak, gari thak, a lampi sial thak, suang leh inn lamthakte Pathian min lou duanduan a latnate, leh adang dang; a kilawm deih ziak leh mite hihdan ahihman a Pastor chial a thil neihte laansak, a neitu lah ut dandan a hinna zatte; hiaite Pathian ginna a kipan ahih kei leh Pathian a dia pomtak lou phetlou in a gim namsia thillat, ahizaw hi. Hiai i gente in Pathian kiang a thillat i hihte hih kei ni chihna lam hilou in a pilvanhuai leh eimah hinna leh gamtatdan a pomtak Pathian biakna ahi hiam? chih kivelna dia i gen ahi zaw hi. A gahsuah leh Pathian pomtak a biakna pen Pathian a ‘Ginna’ a kinga hinna leh thilhihte ahi. Saptuam sung leh pua a kikhopna programme hoih taktak, thupitak leh nuamtak a zang a, thumna a kilawmdan a hong a khak zel chihte ginna a suak hina hiam? A gahsuah lou thilhih leh kikhopna a tam mahmah ta a; Pathian ginna ziak leng hilou in mihing kidemtuahna hileh kilawm a tam, tuate Pathian pomtak thillat tunglou hi.

Pathian Thu Laisiangthou a Hinna a Pomtak Biakna.

I thu nanung leh khitna ding in Pathian thu a hinna a pomtak biakna bang hi hiam chih enle hang. Pathian thu, Laisiangthou ahihna bang a hinpih a a pomtak biakna in thilhih sang in ‘hinna’ bangchi bang hinna hiam chih a taklang zaw hi. Thilhih (nasep) leh thillatte poimoh mahleh kuamah thilhih ziak in siam a tang kei chih theih gige ding ahi. Ahihhang in, ginna a hin ziak a Pathian biakna hih buching miten ‘hiai hih’ chih nasep sang in a hinna uh ginomna leh muanhuaina in a taklang zaw hi. Pathian ading a a thu bang a hinna i chih chiang in lauhuai, buaihuai leh nuamlou omna gen hilou in mihing hinna tanpha leng lauhhuai, thuakna leh haksatnate hong tung ngeingei ding a akilat hun tampi om hinapi in Pathian in chi ahi chi-a muanhuai a, bang teng hileleng hinna tanpha laan (pekhia) hinna ahi (Romte 12:1). Mi tampite’n khovel thilneih hiam, siamna hiam, dinmun hiam Pathian ading a hin utna ziak a piak thupi in i ngai ua, hihhoih talua i sa uhi. Etsakna ding in dinmun leh sepna hoihtak nei ding a omlai hiam, loh tampi sang thei ding hiam, milian leh thuneihna lianpi leen ding hiam khawng kitawp a Pathian nna a sep chiang un thupi lua a ngaihna a om hi. Thupi mah e. Hileleng kei mimal ngaihna ah bel ahi ding mah ahi, Pathian nasep leh mihing nasep bukkak theih vual ahi kei a, tuate sang a thupi zaw thilmuhna a om leh leng Pathian adia latkhiak tham lua hinna tanpha leng piak taak ahi zaw hi. Pathian in na sep theih thupi a ngiat kei a ‘hinna’ a ngiat hi.

Hebrute laikhak bung 11 leh 12 i sim leh tua laibu gelhtu in mi tampi tua bang hinna Pathian thu bang a hing a Pathian pahtawi leh Pathian pomtak hihna ngah mite a gen hi. Amaute’n ahinna uh Pathian ading a Pathian thu bang a hinna in thumal khat leng kitheihmohbawl nuamlou in a hinna uh taan (mangsak) uhi. Amaute, chiang a sat in a om ua, kolhbuh a suangkulh ah khum in a om ua, suang a denlup in a om ua, sing-atna a attan in a om ua, temsau a satlup in a om ua, belam vun silh a gawtkhumsak in a om ua, gamdai ah vakvai in, tang leh kawhawmte ah a teeng uhi. Meikuang ah paihlut in a om ua, humpinelkai kulh ah khiak in a om ua, ngawngtan in a om uhi. Amaute’n tua bang sihna lauhuaite pumpelh thei ding in hunlem mu mahle uh gam hong tung ding ahoih zaw gam a muh ziak un suahtaksak (khahkhiak) a ut kei uhi. A hinna ua Pathian thu ziak a thuak ut teitei in tua lampi a telzaw uhi. Tua pen Pathian in thupi leh pomtaksa in Laisiangthou in Pathian “…amaute Pathian’ chi a minloh a zum kei” a chi hi. (Hebrute 11:16.). Hiai ahi Pathian thu a hihna bang a hinpih a a pomtak biakna. Thillatte leh a kilawm hiam a nuam, thil thupitak a hih chihte, kikhopna nuam leh thupitak neih chihte in a pomtak Pathian a hinna khek theilou ding hi. Thillat a tawm leh tam hilou in Pathian thu ahihna bangbang a zui a, hinpih hinkhua i zat chiang in Pathian ‘pomtak’ biakna kilaan thei ding hi.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia