Articles | KTZ | EBC

BANGHANG BIBLE COLLEGE KAI DING I HIAM?

Missionary minthang mahmah, Adoniram Judson in a thugenna ah, “dollar sang khat nei leng, bang loh ding in n’on gingta uh?” chi’n dong hi. Amahmah in, Bible college building kawk kawm in, “Hiai bangte ah ahi ka sum ka koih ding, khovel tanvaktu ding haichi tang tuh/pawi hi ding ka hi ngal a” chi hi. Eilawi leng tua bang a, Gospel tawi a khovel tanvaktu ding haichi tang pawi (Bible sin naupang chawmtu) a pangkha mi tamtak i om theih, hampha i kisa mamah ua, hiai bang hamphatna hon pia i biak Pathian min i phat hi. Huan, bible sin naupangte mahmah leng Gospel vak puaktu dingte a hihna uah hampha bik mahmah uh i sa hi. Bible college kai, a manphatna/ahoihna gen ding tampi a na om hi ve aw! Tua ahihman in, “Banghang Bible College kai ding i hiam?” chih thupi a nei in houlim khawm zek leng i chi hi.

1. BIBLE COLLEGE: Bible in “amasa ding thilte masasak” a chih sepkhiakna. (Bible College: To implement the Biblical principle of ‘first things first’)

‘Amasa ding masa sak’ chih toh kisai Bible in hiai bang in gen hi. “A gam leh a diktatna tuh zong masa zaw un, huchiin huaiteng tuh a hon piak behlap ding” (Matt. 6:33). I biak Pathian in Laisiangthou ah, tamveitak hih masak ding hon chih leh hon lamet a na om hi. Israelte kiang ah “haigah masa” pe ding in thupia hi. (Eksodas 23:19;34:26). Pathian in kar khat a nimasa pen Amah a dia piak ding hon na ngiat hi. (Eksodas 20:8 cf Kolossate 2:14-17) Khrist in Mosi Dan Kross tung ah hihbei in, Pentecost ni in A Saptuam phuhkhia in Dan thak honna pat pihta hi (Nasepte 2:36-47; 20:7). I khut nasep muhsuahte, Sawm lak a a khatte (1/10) hong ngiat hi (Malaki 3:10-18). David apan sinlai hoihtak nana om tuh: Hun leh ni a muhte a masa lam teng Pathian pia hi (Sam 63:1).

Tua ahihman in, kuapeuh, Khristian kichi tuh Laisiangthou a kibulphuhna kiptak nei di’n Bible thutak sin masa in, tua mah i hinna mahmah ah lakkhia in, i khovel ah puangzak leng, i Toupa thupiak gol semkhetu hikha vek ding hi hang. Uthuai hilou hia?

2. BIBLE COLLEGE: Hinkhua a dia Pathian hon deihdan muhsuahna leh tua dia kisakholhna mun ahi (To find God’s will in life and prepare for the same).

Bible college ah naupang tamzawte, Pathian in bang hih dia deih hiam chih theilou in lut ua. Pathian deihdan chiangkuangtak thei/mu in pawt thei uh. Ahithei mah tuh, Pathian deihna/deihdan chiangkuang lou a om theih mah ahi. (There is nothing wrong or sinful about not having clear direction for the future). Bible college bouruak, manphatak in zang leng Pathian hon deihna muhsuah luat theih a na hi. Student-ten, sinsaktute thugente ngaikhia a, sinsak a omte thumna toh thuktak a ngaihsun kawm a hun ahon zat chiang un… Pathian deihdan mukhia sek uhi. (Kei leng tuate lak a khat ka na hi hi). Laisiangthou in zong hiai bang in chi hi: “Na thu hilhchet in mite a hih vak a; mimawlte a theisiamsak hi” (Sam 119:130). Hiai leng chi hi, “Na thu tuh ka khe ading in khawnvak ahi a, ka lampi ading in vakna ahi” (Sam 119:105). Hiai Bible chang poimoh mahmah nihte gen-ot nop tuh: Maban kalsuan nawnna di hon kawkmuhtu chihna ahi. Khawnvak in i kalsuan nawn ngaknang hon hilh a; vak in i lampi zuih ding hon hilh hi (The lamp showed the next step, and the light showed down the path). Kum nih/kum thum Bible college omna in, Pathian hon totsak nop lampi chiang tak in hon musak thei hi. Mi kuapeuh, lungsim kihongtak a Bible sin ten, a hinkhua ua dia Pathian deihdan - zatnop dan Bible college ah ahi amuhkhiak sek uh. Unau, nang leng Pathian hon deihdan na theichian nuam hia?

3. BIBLE COLLEGE: Bangteng a piching ding in hon khangtou sak hi. (Bible College: helps us grow towards maturity in all aspects).

Students a tamzawte chihtheih phial – khalam, taksalam, ngaihtuahnalam leh sep leh bawl ah piching nai hetlou in College lut ua, a theihlouh sung un- a graduate hun uah piching tuan mahmah, khenkhat piching mahmah in pawtkhia sek uhi. (Bible College a na kaikhate’n thei mah mah ding uhi) Bible sinzou pa/nu hinkhua ah a Saptuam te’n / nulehpate’n muchian mahmah sek uhi. Pichinna (maturity) hon neihna uh hiai bangte ziak ahi thei:

3.1. Thil bangkim a mahni kimohpuak a, kitoudelh dan sintawm/phutou gawp. (Learning personal accountability)

3.2. Niteng poimohte toh kisai a Pathian muandan sin tou. (Learning to trust God for daily needs).

3.3. A hun kipia bangbang zuihdik dan sintou (Learning to live strictly by schedule)

3.4. Hilhtu/makaihtute sin-siamsak a omta, midangte makaih dia kisin. (Being mentored and learning to mentor others)

4. Bible College kaisate (a tangpite) thugen chiamteh dia hoihte:

4.1. Bible college hi mi khenkhatte di’n piangthaklou hih ki phawkkhiakna, Pathian toh kituahna, Pianthakna ngahna mun a hi sek hi.

4.2. Bible college hi Pathian in a deih bang a hon zat theihna dia hon pumkhek hithetna mun a na hi kha sek hi.

4.3. Bible college tuh, Pathian gam nasepna adia khalam leh ngaihtuahna lam a kithopna munpi ahi.

4.4. Bible college hi Pathian thutak thuklut tak a sui a, suut a, sinna munpi ahi.

4.5. Bible college phattuamna phawkkhiak thak thak na hun tuh, Pathian gam nasepna a issue leh challenge tuamtuam phutkhak hun mahmah ah a hi.

4.6. Bible college in, khovel kisetak a thutak, thudik guma kikoupih ngam ding, ban ah, sihdong a pang din hon hanthawn in hon hangsan sak hi.

4.7. Bible college in, ngaihtuahna leh theihna naktak in hon zai-sak in, ahih kei leh hon hihlet sak hi.

4.8. Bible college hi, Bible thutaka thopna leh huai thutak (Bible) theichian a hinkhiakpih ding a kisinsakna mun ahi.

4.9. Bible thu theihna lam a, a tungtuang deuhte (professor/faculty) toh kichimat a omtheihna mun- utut dot theih na

4.10. Bible college hi, i Toupa Jesu, thuksem a it ding a kihasotna leh kisukthathohna mun ahi.

4.11. Bible college hi, ginna detdou tak toh Pathian thilhihtheihna a kinga a, kalsuan khe ding a kihanthawnna mun a hi.

4.12. Bible colleg hi, nam tuam, pau tuam, tawndan tuam, gindan tuam etc nei, i mihinpihte toh innkuan khat bang a khosak khawmna mun hi a, tua in tamtak hon sinsak in hon theisiamsak hi.

4.13. Bible College hi, koppih ding muhna mun zong hi thei hi. Pathian gamna seppih ding- tup kibang-kipiakna kibang muhna mun hi thei mah a hi.

4.14. Bible college hi, mi khenkhat adi’n damsung adia lawmhoih leh muanhuai muhna mun zong a na hi thei mahmah hi.

4.15. Bible college hi, i tenna khovel khang hat /kikhek hat mahmah toh kiton a/kituak a, theihpihna nna/ missionary nna sepna a kihel dia kichilna mun ahi hi.

Thukhitna:
Paul in Timothi kiang a a na gen, ei lak ah zong gen ahi: “Huan theihpih tampite lak a ka kam a thu na zakte, huaite mi muanhuai, midangte hilhsawn thei dingte kiang ah kemsak in.” (2 Timothi 2:2). Unau, Pathian gam nasepna a kihel tei ding– theihpihtu muanhuai hi ding a Pathian in hon deih hi a na theih a, na lungsim a phawkna na neih leh, dai mai ken! Thumna toh Pathian mai zong in, Bible College ah Bible thutak toh thopna ngah phot dia hon deih hi kha ding hi.

GBC ah English in Bible sintheihna i nei: Dip.in Theology, B.Th, leh M.Div
Ei pau a Bible Galzil theihna, ‘Ministerial Training Course’ (MTC) zong om hi. Sunday school naupang (Inter/Senior ten zong) sin thei, A tuailai deuh ten zong sin thei, a upa deuhten zong sin thei veve hi hang.

Simtute tengteng Toupa’n hon ompih in hon vualzawl chiatta hen.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia