Articles | KTZ | EBC

LAISIANGTHOU DIKLOU THEILOU

Tulai in diklouhna, khelhna i genkhak chiang uhiam, i tuahkhak chiang uhiam in, paulou a, lu sinkhumsuk in i om uhi. Pilat bang a “Dik i chih bang ahi hiam?” chi a dot naksang in, tulai mi in, “Bangmah adik omkei,” chih hiam, “Adik chih om tham mah ei, himahleh eite’n i gen theih uh bangmah omkei” chi in i daisuk mai uhi. Eite zuau gen in i khangkhia ua, mi tampi in “Laisiangthou nangawn ah adiklou omkha ahi,” chih ngaihdan nopsakpih i bang uhi.

Khristian khat a ding in Laisiangthou diklou theilou ahi, chih thugin poimoh petmah ahi. Aziak bel, adik, thudik, chih apoimoh petmah hi. Laisiangthou thu in Pathian mihinna akhoihkha a, Laisiangthou in eite hon hilh zousiah i theihna uh kingakna hi a, i kingakna adikleh, i ginna adik a, i ginna adikleh, gamtat khoheidan adik hi. Laisiangthou diklou theilou ahihna i taksan teiteina ding uh aziak bangzahhiam hiai anuai ah a-om uhi.

1. Laisiangthou in abukimna akigen, “TOUPA thute thumal siangthoute ahi uhi. Meiphualpi sung a ngun etchet a a-om bang in, na thute sagihvei sianthousak in a-om uhi,” (Phat 12:6). “Pathian dan abukim,” (Phat 19:7). “Pathian thu teng asiangvek uhi,” (Pau 30:5). Hiaite in agen uh ahihleh, Pathian sianthouna leh abukim sipsipna thu agen uhi. Hiai mun a i theih ding uh ahihleh, Pathian thu “atamzaw” asiangthou a, abukim “dektak” chih hilou in, Laisiangthou in Pathian thu bukim sipsipna agum a, Pathian thu “akhen khat abukim,” chih agenkei hi.

2. Laisiangthou ahihleh, apumpi in adik i chi uh hiam, ahihkeileh zuau agen i chi uhiam, ahih angai hi. Gentehna in: thukizakna, News Paper khat, eite lak ah: Lamka Post hiam, Manipur Express hiam atangpi a zuau gentel gige a theih in omtaleh, simtaklouh, santaklouh a koih in a-om ding hi. Aziakbel, thukizakna kingaknatak ahihna ding in, thuthak gelh a omte atawnsuak a dik ahih ding uh akisam hi. Huchihmah bang in, Laisiangthou in leitung toh kisai agen chiang in dikkei taleh, bangziak a Pathian thu agen chiang a taksan theih hi ding ahi hiam? Huai ziak in, Laisiangthou taksantak ahi hiam, ahihkeileh taksantaklouh ahi hiam ahih ding ahi.

3. Laibu khat peuh in agelhpa hiam agelhnu hiam dinmun ataklang hi. Huchibang in, Laisiangthou inleng agelhpa dinmun ataklang hi. Laisiangthou ahihleh, mihingte zang a Pathian mahmah in agelh hi a, Pathian in mihing zang a Laisiangthou agelhna “hatkhum, hatkhiak” chi in akiminloh a, “Laisiangthou pumpi Pathian hatkhiak a piak ahi,” akichi hi, (2 Tim 3:16) 2 Peter 1:21, Jeremia 1:2 en in. Leitung khua vannuai bawlpa Pathian in Laibu khat agelh thei a, abukim Pathian in abukim laibu agelh thei, chih i taksang uhi. Hiai a poimoh ahihleh, “Laisiangthou ah adiklou atuang hiam?” chih hilou in, “Pathian in bawlkhial thei ahi hiam?” chih ahizaw hi. Laisiangthou ah thu zuau tuang kha hitaleh, Pathian adiktatkei a, amah zuau gen ahi, chihna ahi. Alangkhat ah, Laisiangthou diklou theilou ahi, chih diklou hitaleh, Pathian diklou ahi, chihna ahi. Pathian diklou thei ding ahi hiam?

4. Laisiangthou in eite hon thukhenkhum a, eite’n ahihleh, Laisiangthou i thukhenkhum theikei hi. “Aziak bel, Pathian Thu hing in, sil abawlthei a, namsau lang nih a hiamtuah khatpeuh sang in ahiamzaw a, hinna leh kha, guh-le-tang kizopnate leh guhngek kikhenna nangawn sun in, lungtang ngaihtuahna leh atupte atheichian hi,” (Heb 4:12). Hiai mun ah Pathian thu leh lungtang kizopna ngaihtuah in. Pathian thu in lungtang a-enchian a, lungtang in Pathian thu a-enchian theikei hi. Huai ziak in, Pathian in, “… mihing aw, Pathian kalh a dawng dingpa nang kua na hi hiam? Bawl a om thil in abawlpa kiang ah, “Bangziak a kei hiai bang a hon bawl na hi hiam? chi ding ahi hiam?” a chi hi, (Romte 9:20).

5. Laisiangthou thute avek a, apumpi a pom ding ahi uhi. Aziak bel, Laisiangthou ah thugin helkhawm a omvek ahi ua, eite’n i deihdandan ua zalentak a i deihpen uh i kitelkhiak ding uh ahikei hi. Mi tampite in, “Pathian in hon it ahi, chih Lasiangthou tang adeih ua, Pathian in mikhialte thukhenkhum ding ahi,” chih Laisiangthou tang adeihkei uhi. Ahihleh, gawtmun toh kisai thu ah Laisiangthou diklou ahihleh, vantung gam thu toh kisai in Laisiangthou dik i chi theikei ding hi. Mite gawt ding thu ah Pathian adikkei chi a, mite hotdam ding thu ah, Pathian adik, chi a gen thei ding kua om ahi hiam? Laisiangthou in, “TOUPA aw, vantung ah na thu tangtawn a phuhkip in a-om,” a chi hi (Phat 119:89).

6. Laisiangthou ahihleh, i taksan ding leh i zuih ding kia a hon vaihawmkhum ahi. Laisiangthou gintak tham a, kingakna tham ahih keileh, bang tung ah i ginna uh nga ding i hi uhiam? Jesu in amah taksang ding in eite hon chial a, huai in ama thute taksan ding thu ahuam hi. Mi tampite’n Jesu ataisan ua, ama’n leng a nungzuite kiang ah, “Noute paikhiak na ut uhiam?” a chi hi. “Ahihziak in, Simon Peter in adawng a “Toupa aw, koute kua kiang a pai ding ka hi uhiam? Nang tangtawn hinna thute na nei,” a chi hi (Johan 6:67, 68).

Hiai atung a Laisiangthou thu i gente uh mitdel sialkhaulet ni uhang, i chihna uh ahikei hi. Aziak bel, eite Laisiangthou zong a sut ding a thupiak in i om ua (2 Tim 2: 15), Beriate’n Laisiangthou zong in, asut ua, phat aloh uhi (Nasepte 17:11). Laisiangthou diklou theilou hi a, i sim zohteng ua, “Toupa’n athak in hon vualzawlsak hen,” i chih zihzeh uh ngailou ahi. Aziak bel, Laisiangthou Pathian hatkhum, hatkhiak a gelh hi a, thu hing ahi!

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia