Articles | KTZ | EBC

Pathian in Mihing hihtheih tan hon phut hi

Laisiangthou:
(1) John 11:11-39 Lazar kaihthohna
(2) Mark 2: 1-5 Mizeng khat 4 zawnna

Khamtheih sal a tang Tuailai tampi thattu Zu, No. 4 leh khamtheih damdawi chi tuamtuam saltang 1988 lakvel in heutupa Pumzathang in tuailai laisiam taktakte mi 10 val Lamka zang a omte Singtanglam ah hon zinpih a, hong zin sung ua nelou dawnlou a hong hoih theih khak uleh chi in; himahleh kuamah hoih tuan om lou in a sivek uh chih thu kiza hi, poi mahmah hi! Huchi in khamtheih a saltang tuailaite a dawn lam a pan in Rehabilitation tuamtuam ah i kem ua khat leh nih chih bang hong hoih om zel sam mahleh a phatuam taktak kei hi. Huchi in khamtheih hih Lamka zang kia hilou in, Singtang khota (neu) tanpha a zel suakta. Huan hiai siatgawpna mi tampi in theichian in pawl tuamtuam in i Biakinte uah zingsang thumnate, anngawl thumnate, Ninevi Prayer thumkhawmnate leh a tuamtuam in Pathian kiang ah i na thumta ua, tua ban ah State dangdang nasan ah ‘Pray for Lamka” chih puang in kithumpih taktak mah hi. Himahleh thumna huchitak in uang bawl mah lehang le i lohching uh chih muh ding om lou hi.

Pathian kiang a i buainate uh i tut ding mah ahi. Himahleh Pathian in mihingte hihtheih tan hon phut ahi chih Laisiangthou gen om hi. I Toupa Jesu’n Lazar a sih nung ni 4 pha a kaihthoh ding in mihing hihtheih hankong si’n a suang lakhe masa un chiin thupia hi, huai khit in mihing hihtheih louh Lazar sisa a kaithou hi. Tua ban ah zeng damlou mi 4 in a zawn mah in leng damna mutak ahi chih i thei hi. I Toupa Jesu’n a na sudamta hi. Hiai mi 4 ten a thilhih uh huai damlou zeng Jesu’n hihdam thei ding ahi chih um in Jesu kiang hon zawng uhi. Jesu muhsak tum in, himahleh mi a tamluat man in Jesu kiang tung theilou uhi. A tawp in Jesu omna zawn inn tung hawkkhia in huai damloupa zeng a lumpa, a zawnna toh hon khaikhe suk uhi. Hiai mi 4 ten a hihtheih tan uh a suah ua, huchi in hiai damlou pa’n damna a muta hi.

Huai ziak in Lamka zang a damlouhna pawl chiteng in i awlmoh ua i gam uh hong hihdam din i ngen un i thum ua, kum tamtak i gam ua din i ngen un i thum uhi. Ahihziak in, i gam a dam tuan kei, nidang a a guk a hihten leng a langtang in hihngam ta uh chih kiza hi. Huai in “PATHIAN IN NA HIHTHEIH UH OM HON HIH PHOT UN” chi hikha ding hi. Huai ziak in i hihtheih uh om tham hi. Hiai hi mi tawmchik in i hihtheih a hi kei a mi tampi kithutuak in hihthei hi.

Huai ziak in Lamka zang a Saptuam om teng kithutuak in Zu huan a zuak a omleh a uapkhak Saptuam leh mipi’n khamdaih ding, khodang apan zu leh khamtheih hon pawlutte kham bikbek ding. News a suahsuah ding, kholai Lamka thuam khawng a Notice a tak ding. Huan ah khamtheih tuamtuam No. 4 leh damdawi khamtheih tuamtuam gamdang apan hong kipawlutte duty din Imphal to Lamka Tedim Road ah mun 2 ah duties, huan Behiang, Singngat, Tedim ah mun nih duties. Sugnu to Lamka Saikot Road ah mun 2 ah duties; huai ban Tipaimukh to Lamka ah mun 2 ah duties, lusip a vanpua a khe a hong paite leh Gari a hong pai khempeuhte van na check-up leng. Kum 1 sung bang duty in sem in a dik a matkhak a omte Government ah suangkulh a khum ding in pe zel leng kum 1 sung bang huchi in sem lehang ba zoulou ding i hi hiam? Huchi a i zohzoh keileh, Toupa ka hihtheih dan suah in ka pang ua ka zoukei uh; Toupa nang mah hong pang in, chi in Toupa ah pekhe leng Pathian hong pang leh i gam uh dam hiau mai ding hi.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia