Articles | KTZ | EBC

Hotkhiakna Mantam

Hotkhiakna kichi himhim bang hiam thunei khat toh kimaituahna nasep ahi. Mahatma Gandhi in zalenna a sual sung in tamveipi buaina a phukha a, suangkulh 4vei a tang hi. Tua kia hilou in mipite theisiamsak in mipite makaihna leh British thuneite apan zalenna sualna in a hunteng a zangbei hi. A tung in British te melma hiam mi lauhhuaidan in a hong pai kei uhi. Sumdawng mi leh kisumdawntuah dingdan lunglutdan in a hong pai ua, awl-awl in thuneihna hon deih deuhdeuh uhi. Aziak bel India gam hauhsakna pholhsuah nailouh thupidan a hon muh chiang un hiai ah share hoihtak neithei le uh England gam ading a leng hauhsakpih tham ahi chih a muh chiang in Kumpinu Elizabeth in kumpi thupuan khat bawlkhia in British East India Company thuneihna sangtak leh kithuahpihna ding thusuah bawl hial hi. Tua thusuah in East India Company-te tha guan mahmah hi.

Kumpinu Elizabeth in kumpi thusuah a bawl akipan in British sumdawngte’n a paina lam lam uah pilvangtak in sum leh thuneihna zongkhawm pah uhi. Tua hunlaiin India pen Mughal lengte vaihawmna nuai ah om hi. Britishte hong lut tunglam in agam kumpite toh kilemna leh kitheihsiamtuahna zong mahle uh a tawplam in India amau khut nuai a koih a, gamsung hauhsaknate leng amau thuthu a koih hon lunggulh uhi. Huaiziak in, India gam thuneite toh tam veipi kidouna hong piang hi. Tuate lak ah a minthang Plassey kidouna 1757 a British-te’ vualzohna pen Bengal kia hilou in India vaihawmna amau khut a alut kipatna hong suak hi. Huchiin 1757 apan 1947 sungteng British te ukna nuaia ah India om hi.

Khalam a i et chiang in British-te India gam a awl awl a hong lutdan uleh Setan in mihingte thil tuamtuam zang a hon zol a a tawp a hon thuneihkhumdan toh kibatna a nei uhi. Setan in mi a zol chiang in abul lam ah thudik kimkhat zang in hon zol hi. Tuailai hun a lunglutna hiam, khosak nuamzaw ding lunggulhnate hiam zang in Setan in hun lemtang in a lasek hi. Pathian etdan a hon ensaklou in leitung etdan in hon ensak a thumal lauhhuai mahmah hiaite a hon zangsak ta hi, eg. “a poina om kei, sa leh sisan a omlai i hih chia, haksa lua i hih chia, mi’n leng a hih ve ua le, khovel paidan aka” chihte zang in kilemna hon bawlpih hi. Tua bang dinmun a i om chiang in Pathian’ tehna siangthou apan kaihkhiak a om a leitual zepna a setan in hon nei ahita mai hi. Setan in ahon zoh theihna ding in amah thil etdan (worldview) in khovel hon ensak masa a, tuakhit in amah gam ah hon pilut hi. Setan’ gama pilut a omte a tung in, chethei kisakna, hampha kisakna toh mahni kipahtakna nei tek uhi. Tawlkhat sung bel Setan gama ‘honeymoon period’ zang ahimai uhi. Himahleh a tawpna kah leh mangbatna ahi sek hi. Setan a pil mahmah a koisan ah, bang hun in, bang thilte in ka khem dia chiin “lemtan lai” (Rom 7:8) a muthei mahmah hi.

Tulai khovel bang enleng nidang lai kum 40/50 lai a ihihdan tamtakte uh tulai a leng hih nilouh lai ding mah hia chih ngaihtuah tham om hi. Khovel khangtou hat mahmah i chih lai a, thil etdan ah khanglui paidan leh khanglui ngaihdan (traditionalism, fundamentalism, conserva-tism) chihte hong halhthak in leitung ah kihuat-kinakna pungsak hi. Hiai kichiziatna in leitung mun tuamtuam ah hiamgamna tungsak hi. Etsakna din; Hindu kulmut pawl, Muslim kulmut pawl, China ah Communist kulmut pawl, hiaite’n gam telh mahmah uhi. Hiaite phawk in tu kum BWA Khawmpi in tuabang khanglui ngaihdante Baptist-ten hoih salou, pomtheilou ahihdan uh thupuan bawl hial uhi. Thil hoih i chih khenkhat midangte adia natna, haksatna, sihna tanpha tun thei om hi. Tuaziak in setan pil mahmah ahihman in nang adia thil hoih ahihnak leh midang suksiat leng poikei, chih ngaihdan lauhhuai kiphumgu koipeuh ah om ta hi.

I paunak khat ah “ak kong khaklouh bang” kichi i nei hi. Etsakna leng hi, atak leng hithou, i tulai hindan uh enleng tuhun a hoih isak mahmah tunung a i tate adia hoih hetlou om thei ahi. Mikhat in thil hoihtak ahon pat leh kipahpih a kitosawn sang a, amah hih bangbang hih a kidemtuah sawmna. Thil hoihte pangkhawm a society hiam, kipawlkhawmna dinkhiak sawm sang in mimal a ki-eltuahna a dim i hi. Huaiziak in, Lamka khopi tuh duplicate khopi chih nop huai hial hi. Tuaban ah inn polam prog/ engagement i hau thei petmah uhi. Mi poimoh deuh kichite ngial in tuh kal khat a ni sagih programme a telna di nei, kal khat a zan sagih mah nitak programme nei phialphialte i hi. Programme teng a dawk zoute mithupi i chi uhi. Ngaihtuah thak tuak om ahi, hoih i chihte uh hoih taktak mah hia? Mi toh teh a tawmchik i hih hang in i tuah khak zihzeh tuh; sihna dak ging, khamtheih hih khopi kihi, zukham-sakham, insung kisia chihte adim a omna khopi ahi. Mite zah pha maizen le’ng bang i suak de aw?

Insung kikepna genlai leng, adiktak in i innte uh migam a hotel a zatdan utoh kibang sim hita. Ihmut suah chia i va giah theihna mun, i gilkial chia an i va nekna mun hita. I gennop tuh kuamah insung vei, khapet zen a insung etkolna buaipih ki-omlou phial. Aliante kholak ah i pawt duamduam ua, aneute inn ah ana se deuhdeuh uhi. Sum zongte lah pawtpawt, Laisimte lah pawtpawt, Pathian thu hatte lah polam programme a dim. I Pathian thu uh leng insung a awi man nawnlou, biakin sung leh fellowship-na mun chauh a nakpi a ki-awi. Tuhun a i siatnate uh zan zek a hong kipan ahikei a kum 20 kum 30 paita a insung kikepdan, khotang kikepdan diklou result hong suak ahi. Tuhun a eilawi in Insung a i hihdik kei lai leh kum 20/30 nung in result sezawsem hong kitakkhe lai ding hi. I khamitna, i diktatna i hinkhiakpih masakna mun ding insung a i tate mitmuh ah ahih ding ahi. Inn polam a i buaipih tampite uh bandh puang in insung ah tate toh nu leh pate om dipdep chiat leng mangthang lou in i hingzaw ding uh chih ka gingta hi.

I siatnate uh kholak a hong kipan ahikei a, insung a kisinsakna lohsapna gah ahizaw hi. British-te awl awl a India a hong lut i bang un, insung kikepna i khahsuah hiaihiai ua, huchih toh kiton in setan in i tate uh lungkiakna kol, kingaihsiatna kol, khamtheih kol, gitlouhna kol a bunsak gam ta hi. India koltanna Gandhi leh mi tampite’n suahtaksak sawm a a hinna uh phal a a sual hang un kum 190 sung alut hi. Hotkhiakna a mantamdan hiai lemlak, April 13, 1919 a Jallianwala Bagh kithahna mulkimhuai, tuni tan in thautang mate muh theih in omlai hi. Hotkhiakna man atam hi. Khalam hotkhiakna tuh salam hotkhiakna sang in baihlamzaw kei hial ding chih leng i theih uh apoimoh hi. Tuni a i melma lianpen uh salam melma hilou in Khalam melma ahi. Toupa mite’n i maituah lellel uh lauhhuai mahmah tuh setan zekhemnate ahi (Eph 6:11). Hoih mahmah banga kilang himahleh tunung adia hoih hetlou i hih khakte uh tawpsan poimoh hi.

Khelhna a koltanna a nasat zil in hotkhiakna nasep haksatdan leng kibangkim khollou thei hi. India gam khovel a sahkholian mahmah Hinduism zuite hotkhiakna leh sahkhua sinsak tumta neilou tribal-te laka nasep leng kibang lou ding hi. Bangteng hileh hotkhiakna nasep tuh koltangsak tu thueihna nei khat toh kimaituah alou theilou ahi. Etsakna din, William Carey tuh India gam a missionary dia a hong kuan sawm apan a sihtan in haksatna toh a hinkhua kidim mah bang hi. A zi in India gam a missionary kuan ding a ut kei bilbel a, atawp in hon zui hamham hi. A tate nih a hon khuai pah ua, anung lam in a zi in sihsan nawn hi. A chawmtute bang in sum ginakhaklou uh ahihman in nektawm zong in khedap khui peuh pan nawn a, tawlkhat Indigo factory ah va sem zomah hi. Huchi kawmpi in leng theihtawp in a semtou a lawm ginom leh hoih Joshua Marshman leh Willian Ward-te Pathian in pia in Serampore Trio chi a theih in hong om uhi. Carey leh a lawmte’n Bible, pau 34 in a letkhia ua, thukizakna The Friend of India kichi anung lam a The Statesman hong kichi a pankhia ua, meithaite a pasal kihalna mei a hallup Satti kichidan 1829 kum in hihbeina order suahkhiak in a om hi. Bengali pau a siam ziak in Fort William College ah sinsaktu in pang hi. A sepkhiak thupite ziak in amah tuh Father of Modern Missions chih min hoih piak in a om hi. A thupina leh a siam tung tuannate ziak in Brown University (United States) in 1807 kum in Doctor of Divinity degree pia uhi.

Carey thupina nih muhtheih a om tuh, a tup a tawpsan ngeilouh leh a kingaihniamna ahi. A sih kuan in India gam a missionary minthang khat Alexander Duff in a va veh hi. Duff paikhe dia a kisak lai in Carey in amah a sam a hichiin hon gen hi, “Unaupa Duff aw! Dr Carey, Dr Carey chiin Carey tungtang na gengen mai a; ka sih chiang in zaw Dr Carey tanchin bangmah gen kei unla, Dr Carey Hondampa’ tanchin hon genzaw un!” chiin a thukhak hi.

Apaisa July 2019 khabul in Serampore, Kolkata, mun a Carey han va vehna hunlem ka mu a, a hansuang a thu kigelhte munuam ka hihman in ka va muh tak in ka lung akim mahmah hi. Akisegawp, genthei leh panpihtu neilou lungnou na itna khut ah kong puk hi chih kigelh hi. Hotkhiakna leh suahtakna kichi bangzah a mantam ahi hiam chih hiai ah kilang hi. India Independence Day i zat lai in eite Toupa adia kipethak in i omna gam adia gammi hoih leh diktat hi ding in kipethak ni. La khat in Lei a vai in mun neilou in, gamdai haksa tawnsuak zong leng; Toupa’n kei dia a bawlsa ah, ka khawlsam ding chiaului gei ah a chih i lam-etna ahi.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia