Articles | KTZ | EBC

Nekzonna leh Nasep a Pathian Pomtak Biakna

I Thess 4:11 – 12. Kon thuhilhtak uh bang in mi toh kilemtak a nuntak ding, noumau’ sep ding tek awlmoh ding, noumau’ khut a sem ngiat ngiat ding in nakpitak in tum tinten un. Tua hileh pawlam mite muh a kilawm in na nungta ding uh a, bangmah lah na tasam kei ding uhi.

Nekzonna leh nasep tuh inkuan tengteng in a neih uh, huai lou a kikhosa theilou ahi. Siamtu Pathian inleng om maimai ding a hon bawl hilou – “nasem lou in tuh nek leng nekei hen” (2Thess 3:10) chi a Laisiangthou a hon hilh ahi. Mi khempeuh siamlam nei chiat, leh taksap lam om chiat i hi ua, tua mah a hong kigawmkhawm chia buching pan ding a siam i hi. Mi atuam dungzui in septheih atuam a, ut lam leh siam lam leng a tuam zel. Hiai leng na khat kia a khosakna bukim lou, mikhat kia a zong kikhosa thei lou ahihna hon langsak hi. Leitung a mi masa pen Adam leh Evite apan a hong piang unau nih – Kaina leh Abel-te zong na tuamtuak – khat loubawl/lounei mi, khat pen ganching mi hong hi uhi. Nekzonna ding a nasep tuh mihing te’n i hin sante lak a poimoh pen a hong hi. Aziak tuh ne lou in om leng kisi pah ding ahihman in. Na tampite lak apan a bawng bawng in bang zah hiam i lak a i sep tangpi deuhte en leng.

I. KUMPI NNA: Kumpi nna i genseng het kei ding, amal mal a gen leng i sawm kei. Hiai tuh a semtute adia nekzonna, nek muhna ahi a, kumpi a ding a atup uh tangtunna a gam leh a mite adia khantouhna leh masawnna hi ding hi. Nna zong alian aneu, abaih leh a haksa, asang leh aniam chih ban ah a department zong chi tuamtuam om hi. Nna dungzui a sep dingdan om a, a sem ding a chinna poimoh leng kibang lou lai hi. Nna deih mahmah zon chihtak a zong, a chin loupen in leng sem nuam lai mah kibang – lei a leithoh zawzen na pi - i lei zoh a, sepna piak a i om chia sem lou a lohlak ut pawl bang ki-om thei zel. Tua bang khawng a inkuan vak, tate lai zilsak, Laisiangthou sinsak, Missionary vak, chihte zong ki-om sawnsawn.

II. MISSION NNA: Mi kuapeuh in i ngaihtuahna a i koih tuh kumpi nna sang a niamzaw a i koih uh Mission nnasep ahi. Ahoihna lam et a bel a semtute mi hoih ding, gamtat hoih ding, nunnem ding, diktat ding, kuhkal ding leh ahoih lam tampi adia lamet ahi. Sum leh pai tampi loh lou, dinmun leh hihna lam a leng mi tung et luat louh, himahleh a nna lamet a tampi semkhe dia lamet. Tuabang a mite’n hoih mahmah ding leh bang lamlam hiam a lam etna a neih lai ua, mi gintak banglou, mi lamet banglou, Pathian ading a zong pomtak nasemtu hihlouh ding lau huai.

III. KHUT NASEP: Hiai tuh mi tampi septheihna ahi a, laipil, laisiam loute’n le septheih ahi. Himahleh mi khutsiamte tuh kumpi, saptuam leh khotang in zong a poimoh mahmah te ahi uh. Numei khutsiam, thahat leh taimate’n insung vak zou in pasal khenkhatte sang in thil thupi semzaw tampi om uhi. Khut nnasep simmoh lou in uangbawl semsem leng, i gam, i khua, i insuan khangtou in masawn zawlai ding hi. Tulai ngial bang mistry-te nitha tawm hetlou, sep ding lah tam deuhdeuh. Nasepna vanzat hoih pipi tam, tawldam huai, metzaw, asepkhiak leng hoihzaw, kilawmzaw a septheih hong hita. Khang hampha i hihna mangngilh lou in – Toupa lungkimna leh ama’ pomtak hi ding in i khutsiam nate zang chiat ni.

IV. SUM BAWL: Sum zondan kithei sauh sauh ta, numei pasal kipankhe theita - masawnna, khantouhna ahihman in kipahhuai. Sum deihtakna a lut ding bel kiveng leng aziak tuh – hauhsak tumte khemna, thang, haihuai leh hihsethei duhgawlna tampi ah a puklut nak uhi. Huaiten tuh siatna leh manthatna ah mite a hihtum nak uhi. Dangka sum deihtak zaw gilou chiteng bul ahi; khenkhatte’n a eng ua, ginna apai mangsan ua, amau leh amau lungkhamna tampi in a kisunlet tektok uhi. (1Tim. 6:9 – 10). Bukna leh tehna chinih - azang leh agik neih khawm Pathian in deih lou – a diktak khat zat ding ahi. (Deut 25 :13 – 16; Lev. 19: 35 – 36).

V. LOU/HUAN BAWL: Tuma kum 20/30 paita in Buh kham neih louh tuh thil zumhuai penpen khat ahi. Lou hoihtak tankhak tuh a vatma nangawn a kipahpih uh ahi. Tulai khangte hamphatna tuh buh kham neih louh ding lau chih bang om nawn lou ahita. Buhhum tampi neih sang in antang, lohpi zang lou a huan theih a deihzaw ta uhi. Huaiziak in tulaitak tuh kum 5/10 plan bawl a huan lianpi pi bawl hun ahita. A sawtzaw ading leng nek taksap ding laulou a bawl theih hong hilai ding hi.

THUKHITNA: MBBS = Muh bang bang sem, deihtel thei, ut louh pipi leh sepngai, leh a sepdan ah leng deihtel thei pawl bang ki-om theilai hi. Nna khatpeuh – atha lut di zah, a semtu thuneihna, dinmun leh mohpuakna chiang chih bang om chiat hi. Tua ban ah midang toh kikal ven ding chiang om in – tung-a mi, nuai-a mi leh kim leh kiang hon hetkha thei ding leh kisaikhakpihte toh kikal chidamtak a om theihna ding in – Sum leh pai, pilna siamna, neih leh lam hilouin PATHIAN POMTAK BIAKNA A CHING ZOU KEI KHA DING chih lau in kiveng thei leng hong dik vek ding hi.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia