Articles | KTZ | EBC

Naupang leh Pa hihna a Pathian Pomtak Biakna

NAUPANG LEH PA HIHNA A PATHIAN POMTAK BIAKNANAUPANG LEH PA HIHNA A PATHIAN POMTAK BIAKNA
THUMAPI: I thupi ah ‘Naupang leh Pa hihna a; Pathian pomtak biakna’ chih ahihlai in, tukha sung a saptuam ni poimoh “Naupangte Nipini, Pentecost Ni leh Pate Nipini” chihte a omkhak ziak in. Saptuamte ading in kha poimoh tak ahi chih i thei uhi. Naupangte toh kisai atuam in sut ding chileng maban kinepna bangkim naupangte ahih ziak un, sut ding tamtak a om ding hi. Huan. Pa kichi inkuan siampu ahi a, Inkuan vengbittu ahia, Inkuan thunun a vaihawmtu ahih man in i sut seng kei ding uh. Hiai teng kaihkhawmna ding tuh inkuan ahih man in, Inkuan leh Pathian pomtak biakna chih pansan in kikum leng i thupi tunkhawm kha veve ding in ngaihtuahna i nei hi.

1. INKUAN A PATHIAN BIAK: Inkuan leh biakna kichi tuh a kikhen theilou thil ahi; ginna leh thilhih a kitawn bang a kitawn khawm gige ding ahi. Eimite, a mitam zawng a thilhih mupmup chingte i hi ua, inkuan pawlam ah bel i biakna himhimte uh nuam in changkang thei petmah hi. Huchi ahihlai in mi khat in “Vangam na kai diam?” chih dotna tuh; ‘Hotdamna camping’ laitak ahihleh ka kai ding chi’n dawng a kichi hi. Huai in hon theihsak tuh pawlam a i hihhoih mahmah lai un, mimal leh inkuan ah Pathian pomtak biakna tung zoulou ahi diam chih hon ngaihtuah sak hi. Naupang leh Pa ban ah inkuan mite’n Pathian pomtak biakna kipatna ding tuh ‘Inkuan maitam’ ah ahi:

2. INKUAN MAITAM BANG AHIA? Gospel Centenary khinte i hi uh. I saptuam record (2018) dungzui in EBC pumpi ah inkuan 11,784 a om a, tua lak ah Pastor sem lel -113, Missionary pastor – 32, Full time a semtu – 340 leh Upa ordained – 963 om hi. Census etmai a kipah huai lua ahih lai in inkuan maitam neithei gige bangzah a om dia chih ngaihsut huaipi a suak hi. Inkuan tuh Biakin masapen ahia, saptuamten a lompi a biakhawmna a neih ma un inkuan maitam kichi om khinta hi.

Laisiangthou ah ‘Inkuan maitam’ kimuh masaknapen tuh Noah in a inkuan maitam a dohna ahi (Gen 8:20). Nihna tuh Abraham in inkuan maitam a dohna ahi (Gen 12:8). Jakob in a inkuanpihte kiang ah ‘I thou ding ua, Bethel ah i paitou ding uh; ka lungzin lai a hon dawng, ka paina a ka kiang a om zel Pathian ading in maitam ka doh ding hi, achia’ (Gen 35:3). Job inleng ka tapa ten a lungsim un Pathian a gensia uh ahikha ding chi’n maitam adoh hi (Job 1:5). Huchiin, Sepaih za heutu Kornelia leng officer liantak himahleh inkuan maitam toh kisai a tanchin gelhna etton huai mahmah hi (Nas 10:1-2). Ei inkuan tanchin gelhding hi tazen leh bangchi bang a gelh in a om dia?

Inkuan maitam tuh mimal chihten Pathian toh kipolhna ahi. Pathian mizat tamtakten haksatna tampi thuakzel mahle uh inkuan maitam tungtawn a kitungdingte ahi uh. Pathian in mimal a hotdamna tang ding kia in hon lam-en kei a, inkuan chih a hotdamna tang a, ahing biak piakna pe ding in hon lam-en zaw hi (Nas 16; 31). Pathian in Abraham a vualzawl deklai in ‘Na zi Sarah koi a om ahia?’ (Gen 18:9) a chi a, inkuan pihte tellou a vualzawlna tan tuam ding tuh lemlou hikha ding hi. Israel inkuan chihten maitam a latding inkuan belamnou kineih chiat tang hial un Inkuan maitam poimoh dan hon musak hi (Exo. 20:3).

3. INKUAN MAITAM PATHIAN POMTAK BIAKNA KIPATNA: Khovel hunbi i chihte Pathian in omze neitak a hon sehsak bang in, nikhat a sep dia kilawmte sem in, a ni nawn a ding lemgel zel in hun a kizang hi. Huchi ahihna ah ni khat a hunkhat bek Pathian toh kipolhna ding sehkhiak poimoh lua hi. Khovel damsung tomchik ah inkuan kituak dialdial a biakkhawmna kichi poimoh petmah. Huchih lai in inkuan maitam bawlna hun ding leng mulou a i om leh zaw Pathian pomtak biakna kichi gamlapi hikha ding ahi. Tulai khovel a hoih nawnlouh ziak in nat phutphutna, sih phutphutna zakding a tamta hi. I inkuan pihte zing a pawtkhia nitak lam a damtak a hong tung kiknawn ding uh ahi chih chetna omlou ahihlai a, nitaklam a inkuan kim a tungkik diamdiam a i omsek pen Pathian hoihna ziak ahi. Naupang neupen in leng inkuan kim a om Pathian venbitna ziak ahih dan a theih uh poimoh petmah hi.

Laisiangthou a i muh bang in inkuan maitam omlouhna insung zaw a mulkimhuai lua hi. Siampu Eli inkuan en mah in, Tempul ah Pathian nasem in om mahleh, a tate Belial tate chih maimah in a om uh (1Samuel 2:22–4:22). Ahab inkuan en nawn mah dih, Pathian thaunilh ahia, Inn thupitak (Saiha in) a nei a, kulh thupitak in bawl mahleh inkuan maitam ah a lohsam hi. A inkuan thiltuah a mulkim huai hilou hia, a tapa 70 zette mulkim huaitak in a si uh (1 Kum. 22:1-40; 2 Kum. 9:30; 10:17). Babulon kumpi Nebukadnezar thupi dandan tuh tehpih bei khop ahi. Pathian theilou mi ahih ziak in inkuan ah lohsam in mihing lak apan nohkhiak hilhial in a om hi (Dan 4:28-33). Inkuan maitam a chipsiat ziak in khotang in athuak a, kongzing ah i tanu tapate a bit nawnkei uh hilou hiam? Naupang leh pa hihna ah Inkuan maitam ah kiknawn in Pathian sam thak ni (Sam 5:3).

4. INKUAN MAITAM MANPHATNA: Inkuan maitam manphatna theisiam dingte tuh inkuante mah i hi uh. I namsung a milian leh milal i neih sunte inkuan maitam ngaihsakte insung akipan khanglian ahih tangpi uh ka gingta hi. Toupa Jesu’n Pathian tuh kha ahia, kha leh thutak a be ding in hon sinsak hi (Johan 4:23). Pa zonsuah inkuan maitam zaw a chimse taktak theikei a, mumal tak a kipina muh theih in omzel hi. Komiunis gam a Mr Kenchick kichite inkuan maitam tuh sepaihten a deih kei ua, Inkuan maitam a neihnawn uleh teng singkhat liauding chih thupiak a ngah uh. Miten khawlmai dia a gintak lai un Mr Ken-te inkuan in tu akipan niteng in hun tamzaw inkuan maitam in ka zang ta ding uh a chi zaw daih uhi. Inkuan maitam manphatna theite a din zaw thuakna hiam, haksatna hiam om ding hileh leng a khawlsan utkei uhi.

Pathian pomtak biakna petu inkuan sung ah, naupangten a nu leh pate houpih lou in hunsawt a om theikei uh. A poimoh leh taksap pesektu nu leh pate a houpih sek uhi. Niteng a Pathian biakna nei gige inkuan in bangteng tung mahleh a puakdan a siam zel uh. Sam gelhtu in “Kei ka lum tuh ka na ihmuta a; ka khanglou nawn a; Toupa’n a hon na len gige” (3:5) a chih bang in. Nitak ihmut ding a thumtu in zing a thohkhiak hun in Pathian venbitna ziak in kipahthu gen a tawp theikei hi. England kumpinu’n ‘sepaih sang tamtak sang in John Knox mitsi a a thumna lauzaw a kichi’ hi. Tulai in naupangte smart phone toh kibulh den in, PUBG game toh zankhovak phialphial a phone toh a ki bulh detna in, Inkuan leh khotang siatgawpna ding natna hik virus in hon sual lellel ahih dan phawk thak ni. Nu leh pa tamtakten tate zing thohhak kia lelleng buaipih huai i sak uh gintak huai hi. Inkuan ah pan inla; Na tate thumdan sinsak in a ban zaw Pathian in hihna ding ahi.

THUKHITNA. Pathian biak kichi leitung mihingte hih theih thupipen ahi. Biakna thumal sappau “worship” apan laksawn ahi a, mi kua hiam ahihna, leh dinmun toh kiphu pahtawina tangtak chihna ahi. Hebru paubul a laksawnna apan ‘bokkhup a bia’, ‘a ma a kun’ chihna ahi kichi hi. A tomlam a gen in, Pathian biak kichi leitung mihingte hih theih thupipen ahi, phutluih ziak hilou in mahni lunglutna leh utna dungzui a biakna ahi. Pathian pomtak biakna a om bang in, pomtak louh biakna leng a om hi. Pomtak leh a hing biakna tuh mimal leh inkuan a a kipat ding ahi. Khovel setak lak ah Noah leh a inkuante biakna Pathian in pomtak in a simsak hi (Gen 8: 20). Abram biakna leng pomtak biakna in a simsak a, huchiin vualzawlna in a zui hi. (Gen 12; 1-7). Bible a i muh gingtu masate bang in simtu u leh naute, Naupang leh pa hihna a Pathian pomtak biakna pethei chiat ding in, Toupan hon vualzawl chiat hen.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia