Articles | KTZ | EBC

Pentecost Day Thupuak

(Bible sim dingte: Exo. 23:16a; 34:22a; Lev.23:15-21; Num. 28:26-31; Deu.16:9-12; Joel. 2:28-32; John 16: 1-15; Nas. 2:1-41; 1 Kor. 14:24-25; 16:8).

Thumasa: Thukhunlui hun in Judate Ankuangluina poimoh thum, Judami pasal a sim photphot, Jerusalem leh a kim mel 25 sung a omkhate ading a tel teiteina ding a om hi. Huai Ankuangluinate: Paikan Ankuang, Pentecost Ankuang leh Bawkta Ankuang ahi uhi (Deu 16:16). Hiai bang Ankuanglui hun in kuamah khutvuak a Toupa ma a pailouh ding a, michih in a zoh hun bang uh thilpiak a pe ding uh a chi hi (Deu.16:17). Hiai Ankuangte etsakna nei leh a lim (shadow) ahi ua, a bukimna Jesu Khrist ahi (Kol.2:17). Paikan Ankuang in Khrist sisan jiak a hotdamna ensak a, Pentecost Ankuang in Kha siangthou piakna ensak in Bawkta Ankuang in kum sang a misiangthoute Khrist toh vaihawmna ding a ensak hi.

I. Pentecost bang chihna hiam! (Lev. 23:15-22): ‘Pentecost’ kammal Gk. ‘pentekostos’ a pan teisawn ahi a, sawmnga (50) chihna ahi. Gah masa ankuang a pan simtouh a ni sawmnga chinna, tanghou beu nih silngou toh kihel Pathian kiang a latna ni ahi. Hiai tanghou beu nihte belamnou gensiatbei sagih toh bawngtal tuai khat leh belampa nih toh lankhawm in siampu in vei thillat in a lan hi. Tanghou beu nih silngou toh kihel kilan in Khasiangthou hong tun hun a saptuam nih Juda leh Jentel piankhiakna ding hon musak a, silngou helna in saptuam Jesu Khrist sisan a tatsa leh lat siangthou himahleh bukim nailou ahihna hon musak hi. Paul in Jesu Khrist ah Juda-Jentel chih omlou kha khat a baptis in i omta uh a chi hi (I Kor.12:13).

II. Khasiangthou tunding genkholhna (Joel 2:28-32): Zawlnei neu, Joel in Pathian in mite tung a Kha siangthou sunbuakna ding nichiam om ahihdan BC kum za giatna leh kuana vel in, “Huai nung chiang in hichi a hong hi ding a, mi tengteng tung ah ka kha ka sungbaw ding...” chiin a gen hi. Joel Laibu ah thupi poimoh thum a om hi. Khatna,Gam a siatgawpna hang a mite tunga gimthuakna hong tun chiang in Judah khalam makaite kisik ding a sapna a hi (1:13-14). Nihna, Pathian thukhenna jiak a melmaten gam a umsuak hun in pengkul mut a Zawlnei, siampu leh mipite kisikna diktak toh Pathian hehpihna zawng ding a chialna a hi (2:12-17). Thumna, Judah mipite kisikna dik toh Pathian kiang a kiknawn chiang ua tunding nawn a om ding thamlou a Khasiangthou sunbuak a om a, Toupa min lou peuhmah hotdam a om ding chiin a gen hi (2:28-3:21).

III. Jesu Khrist leh Khasiangthou (Johan 16:7): Zawlnei Joel genlawkna hong tun ding dan Jesu’n a thu nanungte lak ah awlmoh khol a bang hi. “Ka pai nou ding in a hoih, ka pai kei leh Khamuanpa na kiang uah hong tung kei ding; ka pai leh bel na kiang uah ka honsawl ding” a chi hi. “Ka Pa thilchiam, tunglam akipan thilhihtheihna silhsak a na om masiah uh khopi ah om kinken un” a chi hi (Lk. 24:49). Hiai bang deuh in “Pa thilchiam na ngak un, Jerusalem khua paisan kei un” a chi nawn hi (Nas. 1:4b). “ Khasiangthou na tung ua hong tun chiang in thilhihtheihna na nei ding uh... chiin a genlai hi (t.8) . Pa thilchiam Kha siangthou hong tung teitei ding a, bangchi bang a hong tung ding chih chiangtak in gen kei mah leh hiai na tan ma uh ngak un chiin a thuhilh hi.

IV. Pentecost ni leh Khasiangthou tunna: (Nas. 2:1-13): Jawlneite leh Jesu Khrist gen bang in Khasiangthou, Pa thilchiam Pentecost ni in a hong tung hi. Laphuaktu in, “Kumpite kumpipa’n, Damna kha hong zak in, Saltang tengteng tung ah, Suahtakna honpuak hi. Saltanna insung ah, Vualzohna la ging hi, Lungmuanpa hongtungta” a chi hi (Bk.Late no.55: Stanza 3). Hiai ni in nungzuite a vek un munkhat ah a lungsim munkhat in phatuamngai takin a thumkhawm uhi (Nas. 1:14b). Khasiangthou a guk-agal hilou, mi tengteng muh leh theih in a hong tung hi:
(a) Huihpi nung bang in-Huihpi hat in thil tampi mutsiat bang in Khasiangthou in mihing khelhna hon phoulak in mangbang kikou aw hongsuak hi. Gim leh tawlte huih in a tawldam sak bang in khelhna kisik a, beidong leh mangthangte kiang ah lametna leh khamuanna hon puak hi.
(b) Mei bang in: Mosi leh Elija kiang a mei a kilak Pentecost niin Kha siangthou mei bang in mipi muhtheih in hong kilang hi (Exo. 3:2; I Kum. 18:38). Khelhna kangmang a Pathian nasepna ding ahi. Mei in thilhihtheihna nei, khelhna kisikte ngaidam leh kangmang ding a tunglam akipan thahatna toh kithuah nasepna ahi.
(c) Leite amah leh amah kihawm: Hiai hi Peter thugen miten a zak chiat ua, kisik a Jesu Khrist a san theihna ding ua, Khasiangthou in paute a theihsiam sak ahi. Tua thamlou in nungzuite Khasiangthou a dim ua, kha in hihtheihna a piak bang in paute in a pau uhi. Hiai Khasiangthou in thilhihtheihna in a thuam a, nna lamdang ahih uhi.

V. Khasiangthou bang ahia?(Jn. 4:24): Khasiangthou toh kithuahna thu, thopna thu hiam thilhihtheihna leh kha a dimna leh a nasep tuamtuam bangteng om in kigen mahleh Kha siangthou kua hi a, bang hi hiam chih na theihtel kei leh na theikhial hiam na nial kha ding hi. Khasiangthou kua hi a, bang hi hiam chih saulou in i sut ding uh:
(a) Pathian ahi (Jn 4:24): Pathian zaw kha ahi chiin Jesu mahmah in a gen hi. Mi khenkhat in hiai Khasiangthou Pathian ahihlam theilou in power bang hiam, zawl-ai bang dan in a ngaihtuah uhi. Himahleh Khasiangthou hi Tangtawn Pathian ahi (Heb.9:14). Munteng a om (omnipresence), bangkim hihthei (omni potent) leh thil tengteng thei (omniscient) ahi (Ps.139:7-10; Lk.1:35; I Kor.2:10-11). Pathian ahi a, biak ding, phat ding leh pahtawi ding ahi.
(b) Mihinna nei ahi (Jn. 14:26-27): Pa thilchiam, Kha siangthou mihinna nei, ngaihtuahna nei, kipak thei, dah thei leh mihing a om phok theihna (emotion) nei ahi.(1 Kor. 2:10-13; Eph. 5:30). Mihinna nei ahih ziak in a nasep zong phelhmit theih ahi (1Thes.5:19). Kathryn Kuhlman in, “Kha siangthou hi ka mi tuahkhakte lak a mi lamdang pen ahi” (Holy Spirit is the most wonderful person I ever meet) a chi hial hi. Hiai Khasiangthou toh na kimaituah ngei hiam kingaihtuah in.
(c) Thutak kha ahi (Jn. 14:16b): Jesu’n nungzui ginglahte kiang ah, ‘hinna pia zaw kha ahi a, sa bel bangmah din a phatuamkei, na kiang ua ka thugente kha ahi a, hinna leng ahi’ a chi hi (Jn.6:63). Kha siangthou jaw Pa akipan pawt, Thutak kha ahi. Jesu’n, “ Amah thutak kha a hong tun chiang in thutak tengteng ah nou a hon pi ding, amah phuahtawm in thu a gen dek ngalkei a” a chi hi (Jn.16:13).

VI. Kha siangthou nasep leh Kha a dimna (Nas. 2:14-21): Khasiangthou a dimna Pathian Pathian thu a dimna, ngaihtuahna, kampau leh nasep kha in a thununna genna ahi. Pathian thutak leh late i hinna a hinsak (illuminate) a om a, Jesu Khrist Pathian leh Toupa theihpihna ahi. Laisiangthou gen Khasiangthou theikhialte’n kha a dimna zong theikhial uhi.Toupa kha omna peuh ah noplenna a om, Paul in a chi hi (2 Kor.3:17). Huaiziak in Pentecost ni a Khasiangthou hong tung leh kha a dimna thu bang genna hiam chih a en ding hi:
(a) Huntawp tangtunna: Pentecost ni a Khasiangthou hong tunna in hun nanung (end times) toh kisai a zawlnei Joel thugenlawkte tangtunna chiin Peter in a gen hi (Na.2:17-21). Laisiangthou in hun nanung a chih hi Jesu Khrist khovel a hong paina leh Khasiangthou sunbuakna ah hong kipan hi. Tu hun nanung ahihziak in mi tengteng khelhna kisik ding leh Jesu Khrist sang ding a thutanna bawl ding in thupiak ahita hi (Nas. 17:30).
(b) Khelh kiphawksakna: Sawltakliante tunglam akipan thilhihtheihna silhsak a om in, Jesu Khrist leh a thu hangtak in theihpih leh mite khelhna thu, diktatna thu, leh vaihawmna thu a siamlouh tangsak in a lungtangte uh sutbang a na in, “unaute aw, bangchin ka hihta ding ua?” chiin mipite kikou khia uhi (Jn. 16:8; Nas.2:37). Khasiangthou in midangte khelhna kia a hon muhsak a, nangmah khelhna na muh theih kei leh ki vel thak kul chihna ahi.
(c) Khate Hotdamna: Pentecost ni in sawltakte thugenna ziak in khelhna kisikna, hotdamna lampi zawng a patau-beidong thawm a om hi (Nas 2.37). Peter in a khelhnate uh ngaihdamna ding in lungsim khek a, Jesu Khrist min a Baptisma tang ding in chial hi. Huai ni in gingtute sangthum vel a kibehlap hi (Nas 2.41).
(d) Khamangthangte itna: Khasiangthou nasep diktak latsak a om masa tuh namchih akipan mi tengteng in hotdamna a ngahna ding ua pau leh ham thu amau pianpih pau chiat a zaksak a hi (Nas.2:11). Kha siangthou toh dimna ah mangthangte hotdamna ding awlmoh penin a nei uhi (Nas.2:38-40;4:12, 33; Ro.10:1). Kha toh dimna dik Khamangthangte itna, veina ahi (Ro.9:1-5). Khrist, saptuam leh mangthangte itna tellou a kha a dimna a lauhuai hi.
(e) Khrist sepna maban sutzopna: Nungjuite Khasiangthou a dim in, Jesu Khrist sihna leh thohnawnna pansan in khelhna kisikna thu leh Jesu Khrist ginna a mite pilut kia hilou in Pentecost ni a amau tan bangbang Kha siangthou a dimna nei ding in midangte kha thawnpiakte a lunggulh sak uhi. Huai in Jesu Khrist nasepna maban semzom ding in Kha siangthou a pan mohpuakna kipaktak in a sang uhi (Jn.14:12; Nas.1:8; 20:24,28).

Thukhitna: Khasiangthou leitung a omden ding a piak ahi kei a, hotdamte tatna ni ading a chiamtehna ahi (Eph.4:30). Aman khelhna, diktatna leh vaihawmna thute a khovel siamlouh dan langsak ding a hong pai ahi (Jn.16:8). A thilhihtheihna toh hon ompih sung in Toupa na sem ni. Kha in mangthang it a, a sual lai in mangthangte i zong ding uhi. Hun nanung ah Saptuam in namchih kiang a gen ding a neih hotdamna thu leh mikhialte Khrist khebul a pi ding ahi. Saptuamte lametna mun khat, pumpi khat leh kha khat, Toupa khat, ginna khat, baptisma khat a a sapte kipumkhat in, ki-ittuah in pangkhawm chiat lehang Khasiangthou in zalentak in a hon zang ding hi (Eph. 4:4-5). Simtute, Toupa’n hon vualzawl hen... Amen!

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia