Bible Study | KTZ

Kilakna Laibu

THUMASA
Director of Ministries in mohpuakna a hon piak bang in Khristian Thukizakna a Laisiangthou sinna (Bible Study) gelh ding in ka hong kisa hi. Sin ding laibu piak ka hi kei a, tukum a i saptuam thupi “Nang Vualzawlna Hi In” chih toh kituak deuh hileh chih a deih dan ahi. Pathian kiang a thumna tamtak ka neih nung in Kilakna laibu bung 2 leh 3 a saptuam sagihte - Ephesa, Smarna, Pergamos, Thaitira, Sardis, Philadelphia leh Laodisia - kiang a laikhakte sin leng ka chi hi. Hiai laikhakte ah Toupa’n saptuamte A kipahpihna, A demna, A thupiak leh A hasotna thute i mu hi. Gingtu mimal leh saptuam, Pathian in a hon phut leh lamet bang i hong hih chiang kia a midangte adia vualzawlna hi thei ding i hihman in i sin ding thute i saptuam thupi “Nang Vualzawlna Hi In” chih toh kituak a ka theih ban ah lungluthuai leh poimoh mah leng ka sa hi.

I. KILAKNA LAIBU PUTLAKNA TOMKIM
A. A gelhtu leh A gelh Hun
Jesu Khrist theihsak leh muhsak bang in sawltak Johan in Thukhun Thak a laibu nanung pen Kilakna Laibu a gelh hi (1:1, 4, 9, 22:8). Saptuam thugousiah masate’n kituak tak in Tanchin Hoih lina leh laikhak thum gelhtu sawltak Johan in Kilakna laibu a gelh, a chi uh. Saptuam pate Justin Martyr, Irenaeus, Alexandria khua a Clement leh Tertullian inleng sawltak Johan in Kilakna laibu a gelh, chi’n a theihpih uhi.

Sawltak Johan in Kilakna laibu a gelh hun ahihleh Rom Kumpipa Domitian lal hun beikuan A.D. 94 leh A.D. 96 kikal hi dia gintak ahi. Kumzabi 2na a Irenaeus in a laigelh ah Domitian lal hun beikuan a Kilakna laibu gelh ahi chi’n a puangkhia hi. Hiai laibu a gelh hun in sawltak Johan teek tak hita, a sakum leng 80 vel hita ding leh a sih kuan mah mah leng hita ding a gintak ahi.

B. Kilakna Laibu Hong Piandan
Kilakna laibu sung a thute leh thilte sawltak Johan in a zak leh a muh bang bang a a gelh lai in, amah Patmos tuikulh a khakmang a om ahi. Patmos tuikulh Ephesa simtumlam Aegean tuipi a om ahi. Hiai tuikulh mel 10 vel a sau, mel 6 vel a za, suangphom lak zuih theih lampi ginatak omlou gam ahi. Sawltak Johan in tanchin hoih muanhuai tak a a tangkoupih ziak a Rom kumpi in hiai tuikulh a a khakmang (exiled) ahi. Patmos tuikulh a a om lai in Jesu Khrist in tunung a khawlvel a thil hong tung dingte aban ban a kizom in mengmuhna in sawltak Johan mu sak hi.

Rom kumpi in man a Patmos tuikulh a a khakmang ma in sawltak Johan in Ephesa khua a saptuam leh a kim-kiang a khawpi saptuamte lak ah Pathian’ thu gen hi. Tu in ahihleh Patmos tuikulh a khakmang a omta ahih man in saptuamte kiang ah Pathian’ thu gen thei nawn lou hi. Huchi’n Pathian’ thupiak bang in saptuamte hihhatna ding in lai khak hi. Huai hun in saptuamte sawi in a omta ua, a tawm pen in mi khat (pastor himaithei) martyr a thah in omta hi. (2:13). Kilakna laibu sung a thute’n sawina leh gelgawtna tuak lel saptuamte hasuan in lametna hing pe ngei di’n gintak huai hi.

Kilakna bung 1-3 a kigen tualsung saptuam sagihte ahihleh sawltak Johan hun a a tak a om mah ahi uh. Bung 4-22 sung thute ahihleh tunung a hong tung ding thugenkholh ahi. Kilakna laibu sung a thute tawn a Johan in saptuamte kiang a taklat nop pen ahihleh Pathian in bangkim tung ah thu a nei hi. Aman mihingte thil tuah-le-tan teng tung ah thuneihna bukim A nei hi. Migiloute leh gitlouhnate pung in uang sem sem mah leh tunung chiang in a mangthang vek ding uh. Dik a thukhen ding leh vaihawm ding in A thupina toh Khrist a hong pai nawn ding, chih ahi. Hiai gingtute lametna hing ahi. Huaiziak in, sawina leh gimthuakna lak a lungkelou a Toupa adia sih pha a muanhuai ding ahi, chih ahi.

II. SAPTUAM SAGIHTE TOH KISAI
Kilakna bung 2 leh 3 sung ah saptuam sagihte kiang a laikhakte i mu. Saptuam sagihte ahihleh Ephesa, Smarna, Pergamos, Thaitira, Sardis, Philadelphia leh Laodisia ahi ua, tulai hun a Turkey gam a na om ahi uh. Sawltak Johan in a laikhakte a gelh hun in Rom lalgam Asia gambup ah saptuam dang tamtak leng a om sam ua, huaite ahihleh Kolosa, Tralles, Manisa leh adang dangte ahi. Hiai tualsung saptuamte kiang a leng lai khak theih himahleh Toupa’n tualsung saptuam sagihte kia telkhe tuam hi. Hiai saptuam sagihte telkhiat tuam ahih ziak ahihleh hiai tualsung saptuam sagihte’n amau nung apan Jesu hong painawn matan a hong om tou ding saptuamte dinmun leh ahihna ding uh a etkholh sak ziak ahi. Hiai a kichetna ahihleh Kilakna bung 1:3 ah kilakna laibu pumpi thugenkholh thute ahi, chih i mu a, hiai thugenkholh kichi thumal in bung 2 leh 3 a thute tel in bung 4 apan bung 22 sung a thu teng a gen hi. Huaiziak in, hiai tualsung saptuam sagihte kiang a laikhakte’n sawltak Johan hun a tualsung saptuam sagihte’ dinmun leh hihna diktak gen himahleh tunung a thukhun thak saptuamte dinmun leh hihna ding leng a genkholh ziak in tuhun a i saptuam dinmun leh hihna toh leng kituak thei ahih man in a poimoh mahmah hi.

Saptuam sagihte toh Kisai Theihtuak Khenkhatte
1. Kilakna bung 2na leh 3na a thute Jesu Khrist’ kampau ahi ua, Aman a gen bang bang a sawltak Johan in a gelh ahi. Hiai bung nihte ah Jesu Khrist in Thukhun Thak saptuamte gamtat ding dan: a hih dingte leh hihlouh dingte; A kipahpihte leh kipahpih louhte kitel tak in genkhia hi.

2. Kilakna bung 2na leh 3na a thute Jesu Khrist in a Vaihawmna Laltutphah apan A gen ahi. Hiai bung nih a thute A thohnawn nung a van a A vaihawmna tutphah apan Jesu Khrist in A gen ahih ziak in poimohngaih ding ahi. Hiai khawvel a mihingte’ mitmuh a simmoh huaitak a sa a hong vak lai a A thugen ahi kei a, lei leh van a thuneihna teng teng piak a om a, Pa Pathian taklam a laltutphah apan a gen ahih ziak in mawk koihdap mai louh ding ahi.

3. Kilakna bung 2na leh 3na sung ah Jesu Khrist in “A Thugen Zak Ding” (ngaikhiat ding) chih sagih vei A gen hi. Hiai in A thugente saptuamte’n a poimohdan a theihna ding uh leh a zuih ding uh A deihna a sagihveitak gennon ahi. A thugente saptuamte khalam dinmun leh hinkhua ding diktak ahi a, hiai dinmun leh hinkhua nei lou saptuamte Aman thunun ding ahih ziak ahi. (Kilakna 2:7; 11; 17; 29; 3:6; 13; 22).

4. Saptuam Adia Poimoh pen Khalam Dinmun leh Hinkhua ahi. Mihingte’n saptuam i gen chiang in a mi phazah (membership) in kigen deuh nak hi. Saptuam a minkhum a tam zoh peuh leh ahihkeileh biakinn kai mi a tam zoh peuh leh saptuam hat in kikoih hi. Etsakna in, mi 2000 biakinn a kai zelna tualsung saptuam, mi 100 a kaina tualsung saptuam sang a hatzaw a ngaihtuah ahi. Himahleh Jesu Khrist in biakinn a mi kaizah (a tam leh tawm) ngaih poimoh pen in a nei kei. Aman saptuam sagihte kiang ah saptuam mizah a tam ziak a A kipahpihna thu ahihkeileh a tawm ziak a A salhna thu i mu kei. Saptuam ah a mi tam leh tawm thil poimoh pen ahi kei a, a poimoh pen saptuam mite khalam dinmun leh a hinkhua uh ahi zaw.

Mi khenkhat in kumsim budget leh sum neihzah in saptuam dinmun a taklang a chi uh. Kumsim budget khangsak zou a, semtu goih zah a behlap touh zel leh saptuam khang a masawn in koih uhi. Biakinn lian leh hoih, Staff quarters tam zaw leh hoih zaw a neih zoh uh leh saptuam khang a masawn in kingai uhi. Hiaite Jesu Khrist’ mitmuh in khalam dinmun toh teh in bangmah lou leh manphatna bei bang lel ahi. Jesu Khrist in saptuam a A zon thil khat kia a om a, huai ahihleh saptuam mite piangthak ahi uhia? Piangthakte’n Ka thupiakte a zui uhia? Keimah theihpihtu muanhuai ahi uhia? chih ahi. Saptuam neitu Jesu Khrist in saptuam ah leilam thilte zong lou in, vanlam thilte A zong zaw; salam thilte zong lou in khalam thilte A zong zaw hi: “Toupa’n mihing et bang in a en kei, mihing in pawlam a kilatdan a en a, Toupa’n bel lungtang a en zaw hi (I Samuel 16:7). Piangthak lou, Pathian thumang lou, muh theih leitung thil leh sum leh pai a hausa mi 2000 omna saptuam sang in mi piangthak, Pathian’ thupiakte zui, diktat tak leh Pathian limsak tak a hing, himahleh muhtheih leitung thilte leh salam a hausa lou, mi 200 lel omna saptuam, Pathian’ mitmuh in a manpha zaw hi. Noah leh a inkuanpihte mi 8 kia himahleh huai hun a midang tamtakte sang in Pathian’ mitmuh in a manpha zaw uhi, aziak ahihleh Noah leh a innsung mite Pathian mitmuh a, diktat leh Amah thumang ahi ua, midang teng bel mi diktatlou leh Pathian thumanglou ahih ziak uh ahi.

5. Saptuam a Mi Poimoh Pen Makaite Ahi Uh. Jesu Khrist in saptuam sagihte kiang a A laikhakte, saptuam chih a “Angel” kichi minloh (address) in ahihkeileh tawn in A khak hi. Hiai “angel” kichi saptuam chih a pastorte ahihkeileh makaite genna ahi. Jesu Khrist in saptuamte a mohsakna, a taihilhna leh a omdan ding ua A gente pastor ahihkeileh makai tawn in A gen hi. Hiai in saptuam mite’ khalam dinmun tung a mohpua lianpen leh poimoh pen pastor ahihkeileh makaite ahi uh, chih a taklang hi. Pastor ahihkeileh makai hingal a, mohpuakna ngaipoimoh lou mi tung a gik hi (Jeremia 23).

Tulai in saptuam makai (Pastor leh upate) muanhuai lou, Pathian’ thutak ahihna bang tak a gen ngam lou a, saptuam mite ngaihnop zawng, amaute kipak sak a, a nopsakna (entertainment) ding uh thute gen thei lel kiom panta. Amaute’n Kumzabi 19na a Baptist thugen minthang leh Pathian zat mah mah, Charles Spurgeon in a na genkholh thu a tangtung sak uhi. Spurgeon in “A time will come when instead of Shepherds feeding the sheep, the church will have clowns entertaining the goats.” (Hun a hong tung ding a, huai hun chiang in saptuam in belamte vak belampute hilou in keelte nopsakna pe ding chiamnuih siamte (Jokers) a nei zaw ding) a na chi hi. Tulai in saptuam a thugen khenkhat in Laisiangthou in kitel tak a a gen khelhna, Pathian thangpaihna, Pathian thununna, tangtawn gawtmun chihte gen ngam nawn lou in, Pathian’ itna, hoihna, vualzawlna chihte leh mihing lungsim nopna ding leh salam damtheihna ding ban ah sum leh pai hauh theihna ding lampite gen tam zawta uhi. Hiai bang thute leltak gen pastor leh makai hilou a, saptuam mite pianthakna ding, khalam khanna leh pichinna ding leh Jesu Khrist adia theihpihtu muanhuai hihna ding awlmoh pen a nei a, Pathian thutak ahihna bang tak a gen ngam hih ding Pathian in saptuam makaite A sapna leh A lametna ahi zaw, chih theih ding ahi.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBC Media