Bible Study | KTZ

EPHESA SAPTUAM KIANG A LAIKHAK

Laisiangthou Pansan: Kilakna 2:4-7

Thumasa: June kha in Ephesa saptuam kiang a laikhak sinna Khenpi IIIna tan i nei ua, tu July kha in aban sunzom in Khenpi IVna apan en ni.

IV. JESU KHRIST IN EPHESA SAPTUAM A DEMNA (Tang 4)
Jesu Khrist in Ephesa saptuam a thil lite - A Sepgimna leh Kuhkalna uh, Thugin Dik a Kepbitna uh, A Bahlouhna uh, Nikol pawlte’ Thilhihte a Huatna uh a phat toh kiton in demna khat nei hi. Tua a demna ahihleh Jesu Khrist a Itna Masa a Tawpsan uh ahi.

A. “Itna” Grik ah agape ahi a, itna thukpen genna in a kizang hi. Jesu Khrist in “Non itna na tawpsan” a chi kei a, “Non itna masa na tawpsan” a chi. Ephesa saptuam in Jesu Khrist it lou hilou in, itna masa a it nawn lou uh chih ahi. Paul in tanchin hoih a vagen a, Jesu Khrist ginna tawn a hotdam ahih chiil lai ua Jesu Khrist a itna bang ua, kum 30 val ding vel a pai nung a, Johan in lai a khak lai in a it nawn kei uh. Saptuam a dinkhiat chiil lai a Jesu Khrist a itna uh meihol ampha mahmah bang hileh, Johan in lai a khak lai a, a itna ua meivu tuta, ampha zou nawn lou chihna ahi. Johan in lai a khak lai in saptuam mite Khristian khang nihna (second generation Christian) ahita ua, Khristian khang masa mah bang in phatuamngai tak leh kuhkal tak in saptuam nna sem in buai mah le uh, khang masa a gingtute bang in itna masa in Jesu Khrist a it zom nawn kei uhi.

B. Itna Masa Hilhchetna leh Kilatkhiatnate:
“Itna Masa” kichi khelhnate kisik a, eimah mimal Hondampa leh Toupa a Jesu Khrist pom a, hotdam i hita chih i kitheihchet a Jesu Khrist i itna ahi. Jesu Khrist in ei mikhial mangthang a hon it ziak in i sik leh tang a i khelhman hon piaksak in kros ah a hong si; Amah ginna tawn in i khelhnate ngaihdam ahita; i khelhman leh khelhna thuneihna apan a hon tankheta; tangtawn hinna a hon peta, chih i theihchet ziak in Jesu Khrist tung ah i kipak mahmah hi. Amah it in i ngai a, Laisiangthou simna leh thumna tawn a Amah toh kithuahkhawm nuamsa in hiai bang in hun tamtak i zang uhi. Miteng leh khawvel thil teng sang a Amah it zaw in, Amah thupiakte i zui hi. Thil teng a Amah kipahsak tup pen a nei in, gingtute kithuahkhawmna leh kikhopnate ah muanhuai tak in i tel hi. Hun lemtang i muh bang in mangthangte kiang ah tanchin hoih gen i kilawp hi. Hiai lungput leh thilhihte Jesu Khrist i itna masa kilatkhiatna ahi.

C. Itna Masa Tawpsan:
Jesu Khrist i itna masa thakhat/hun tomkha sung a tawpsan ahi kei, awl awl a tawpsan ahihziak in gingtu tamtak in a phawk pah kei uh. Saptuam ahihkeileh leitung vai leh thilte a pumbuai gawp a, mimal a Laisiangthou simna, thumna leh gingtute biakkhawmna leh kithuahkhawmnate limsak lou hiaihiai a i nawlkhin chiang in hun bangtan hiam nung in Jesu Khrist i itna masa dai hiaihiai in a tawp in kitawpsan thei hi. Hiai bang a khalam thilte awlmohna a kiam hiaihiai toh kiton in khawvel thilte itna leh awlmohna a lian hiaihiai a, a tawp in khawvel thilte’n Jesu Khrist i itna khengkhe zou hi. Hiai bang in Jesu Khrist i itna masa tawpsan kia hilou in, i itna ngial leng tawpsan theih ahi. Hiai tan hial i tun chiang in Dema toh kilamdang lou i hita: 2 Timothi 4:9b ah Timothi kiang ah Paul in a seppih Dema toh kisai in, “Dema in tulai khawvel a it ziak in ahon paisan” a chi. Jesu Khrist i itna masa i tawpsan chiang in saptuam vai leh thilte ah kihel zel mah leng Jesu Khrist i it ziak leh Amah kipahsak tupna hinawn lou in, saptuam a dinmun lunggulh ziak leh dinmun toh kituak a hih ding ahih ziak leh mihing’ maipha zonna lel ahi zawta.

V. EPHESA SAPTUAM KIANG-A JESU KHRIST THUPIAK LEH VAUNA (Tang 5)
Itna masa a Jesu Khrist a it nawn theihna ding in, Ephesa saptuam kiang ah Jesu Khrist in thupiak thum leh vauna a pia hi.

A. Thupiakte
1. Theigige In: “Na pukna laitak Theigige in”: Pathian paimangsanna khat peuh bawldikna dia kal masa pen paimangsanna mun a kiknawn ahi. Huai ziak in, Jesu Khrist in a kiang uah hotdam ahih chiil ua, Pathian’ itna kia a hotdam ahihna uh, hotdam ahih uh lamdang a sakna uh, Jesu Khrist a a lungkimna uh leh a kipahna uh, Laisiangthou simna leh thumna tawn-a Jesu Khrist toh kithuahkhawm nuamsa a hun tamtak Amah toh a zatkhawm uh, gingtute thumkhawmna leh biakna kikhopnate a ginom tak a a kihelnate uh leh Jesu Khrist itpen a nei a, thil teng-a Amah kipahsak a tup pen uh ngaihtuah kik a theigige ding in thu a pia hi. Pathian paimangsanna tamtakte i theihsate leh thihhihsate mangngilh ziak ahi a, i pukna laitak ngaihtuah kik a phawk thak nawnna kia ah thohkiknawnna kipan thei hi.

2. Kisik In: “Kisik In” kichi Grik ah ‘metanoeson’ ahi a, lungsim khek in chihna ahi. Ephesa saptuam in Jesu Khrist leh khalam thilte sang-a saptuam a dinmun leh khawvel thilte a it zawkna uh leh Amah kipahsak sang-a mihing kipahsak tuppen a neih uh lungput diklou kheng ding in Jesu Khrist in thu pia hi.

3. Hihnawn In: A thilhih masapente uh hihthak ding in Jesu Khrist in thu pia hi. Jesu Khrist itna, thilhih in a zui lou thei kei. Thilhih in a juih louh itna, itna dik ahi kei. Jesu Khrist mah in a nungjuite kiang ah, “Non it uh leh ka thupiakte na zui ding uh” a chi (Johan 14:15). Ephesa gingtute’n saptuam nna tamtak muanhuai tak in sem mah le uh, tuate Jesu Khrist itna masa a it lai ua a thilhihte hihkha lou hi ding ahi. Huai ziak in, itna masa a Jesu Khrist a it lai ua a thilhihte uh hihthak nawn dia thupiak in a om uhi.

B. Vaukholhna
Paite Laisiangthou ah, “Huchilou in zaw na kiang ah ka hong pai dia, na kisik kei leh a omna kipan in na tuikuang koihna ka suan ding hi” chih ahi. New King James Version ah “or else I will come to you quickly and remove your lampstand from its place unless you repent” chih ahi. Hichi’n ei pau in let thak leng a gen kha zaw deuh diam ah, “Na kisik kei leh kintak in na kiang ah ka hong pai dia, amun a kipan na tuikuang koihna ka lakhe ding hi.” Ephesa saptuam in kisik a, a thilhih masate uh hihthak nawn a, itna masa a Jesu Khrist a it kei uh leh thukhenna (Judgment) tuak ding ahi, chia vauna ahi. Hiai thupiak thukin ahi chih theihsakna in Jesu Khrist in na kisik kei uh leh na kiang ua kintak a hong pai ding ing a, na tuikuang koihna amun apan lakhe ding ka hi, chia a vaukholhna ahi. Hiai vaukholhna ah chiamteh dia poimoh thil 2 a om.

1. “Ka Hong Pai dia” Hiai in Jesu Khrist hongpai Nihveina (Second Coming) leh Rapture gen ahi kei, thukhen dia a tuam mawngmawng a (special) Jesu Khrist a kiang ua a vapai ding genna ahi.
2. “Kintak in” hiai thumalte’n Ephesa saptuam a kisik kei uleh hun sawt kihal lou a, a tung ua thukhenna tung pah ding ahi chihna ahi.

3. “Tuikuang koihna ka lamang ding” A kisik kei uh leh a tung ua tung ding thukhenna ahi. Hiai in gingtu in a mimal hotdamna ahihkeileh Pathian’ itna mansuah ding a gen kei a, khawvel a Jesu Khrist’ theihpihtu ahihna saptuam apan lakkhiat a om ding genna ahi. Ephesa saptuam in Tanchin hoih/Pathian thutak vak bang a tangkhe sak in khawvel khalam a mial tak ah Jesu Khrist theihpihtu hihna hamphatna a nei hi. Himahleh a kisik kei uh leh Jesu Khrist theihpihtu ahihna uh lakmang sak in a om ding uh.
Dahhuai tak in a tawp in Jesu Khrist’ vauna a tak in a tangtung petmah hi. Ephesa saptuam in a hoihna leh a hatna kumzabi bangzah hiam a sunzom thei lai a, suahlam saptuam’ heutute (bishops) mun poimoh ahih ban ah A.D. 431 a saptuam khawmpi lian neihna mun leng ahi. Himahleh, kum zabi 5na nung in Ephesa khawpi niamkiak hiai hiai in kumzabi 14na in Turkey (Turks) mite’n Ephesa khawpi a teng mi omsun teng a tuah khevek ua, a khawpi sesa tuni tan in muhtheih ahi lai hi. A khawpi lui kisesa tuni in Turkey gam a Selcuk kichi khawpi ah muhtheih in a om hi. Tuni in Selcuk khawpi a mihing omzah laka 99% Muslim ahi a, Laisiangthou a kibulphuh Jesu Khrist theihpihtu hithei Khristian chihtham a om zou kei uh. Huchi’n Jesu Khrist vauhilhkholh bang in Ephesa saptuam tuikuangkoihna amun apan lakmang in a om petmah hi.

VI. JESU KHRIST IN EPHESA SAPTUAM A CHIALNA LEH THUCHIAM (Tang 7)
Jesu Khrist in Ephesa saptuam kiang a a thugen chialna leh thuchiam in a khak hi.

A. A Chialna
“Saptuam kiang a Kha thugen bil nei peuh in za uhen”: Bil nei peuh in, Pastor/upa/zawlnei tawn a Ephesa saptuam kiang a thu gen himahleh thupiakte leh vauna limsak a zui dia chialte mimal gingtu ahi. Hiai in Ephesa saptuam mi tamtak himahleh Jesu Khrist toh kizopna leh kisaina pawl vai leh thil hilou in, mimal vai leh thil ahi zaw, chih Jesu Khrist in a taklang hi.

B. Thuchiam
“A vualzoupa kiang ah Pathian Paradise a om, hinna sing a nek ding in ka pe ding”: “Vualzoupa” kichi Ephesa saptuam a gingtu kuapeuh a pukna laitak theigige a, kisik a, a thilhih masate hihnawn a, itna masa a Jesu Khrist it nawn mi genna ahi. Hiai bang a vualzou gingtu kiang ah hinna singgah nek dia piak, Jesu Khrist in a chiam hi. Laisiangthou a hinna sing a kigen masakna Genesis 3:22 ahi a, khelhna a Adam leh Evi a puk zoh un hinna singgah a nek theihlouhna ding un Eden huan apan Pathian in hawlkhia hi. Hinna sing a kigen nawnna ahihleh Kilakna 22:2 ahi a, Jerusalem thak a kongzing lai a lui lang tuaktuak ah hinna sing a pou hi. Tua hinna singgah sawm-leh-nihte (a gah khat kha khat ading) tua khawpi a teng mite adi’n ann ahi. Hinna sing in Toupa Jesu Khrist a ensak a, Jesu Khrist in Amah it gingtute vak in a hatsak hi.

KIVELNA DINGTE
1. Jesu Khrist in saptuam leh eimah gingtu mimal hon velchian leh kipahpih a, a phat ding leh a dem ding bangzah a mu dia? Kipahpih a ahon phatna ding sang in ahon demna ding a tam zaw mai diam?

2. Saptuam vai leh thilte a phatuamngai tak leh kuhkal tak a kizang a, i thait mah mah lai a leng Jesu Khrist i itna masa tawpsan khinta ana hihkhak theih ahi. Jesu Khrist leh gingtu kal a poimoh masa pen Ama nna sep (Serving Him) hilou in, Amah it pen a neih ahi zaw. Amah itpen nei lou himahleh, saptuam nasep a pumbuaina Jesu Khrist a kipahpih kei. Gingtu chih kiang a a dot gige ahihleh, “Nang hiaite sang in kei non it zaw hia ?” chih ahi. Jesu Khrist a itna masa tawpsan gingtu/saptuam a kisik kei leh Jesu Khrist theihpihtu ahihna hamphatna lakmang sak in a om ding. Hiai thil lauhuai tak ahi.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBC Media