Bible Study | KTZ

SMARNA SAPTUAM KIANG A LAIKHAK

Laisiangthou Pansan: Kilakna 2:8-11

T.8 Huan, Smarna khua a saptuam angel kiang ah hichibang in gelh in: A masapen leh a nanungpen, huai si a hing nawnta in hiai thilte a gen hi.

T.9 “Na thilhihte, na gimthuak dan leh na zawn dan (himahleh na hau hi); Judate hiloupi, ahi a kigen Setan’ kikhopna inn Pathian gensiatna ka thei hi.

T.10 Na thuak pah ding thilte kihta ken. Ngai in, ze-et a na om theihna ding un Diabol in na lak ua khenkhat suangkulh ah a hon khum pah ding, ni sawm sung gimthuakna na nei ding uh. Sih pha in ginom in, huchi in hinna lallukhu k’on pe ding.

T.11 Saptuam kiang a Kha thugen bil nei peuh in za hen. A vualzoupa sih nihna hihnat in a om kei ding a chi, chi in.

I. SMARNA
A. A Khawpi
“Smarna” kichi Grik thumal Smurna akipan laksawn ahi a, Paite Laisiangthou ah murra a kichi hi. Murra ahihleh suahlam gam apan hong pai mipilte’n naungek Jesu a veh ua, a thawnpiak thilte uh lak a khat ahi (Matthai 2:11). Smurna/murra kichi commiphora myrrh singnai apan bawlkhiat, kha timtiam gimnamtui chikhat ahi. Commiphora myrrh singkung a paklai in a hawng ngek (tender bark) dawt/gawizan in hiai apan Smurna/murra gimnamtui bawlkhiat ahi.

Jesu Khris hong pian ma kum 3,000 sang a tamzaw akipan Smarna khawpi longkhawlna munpi leh khawpi luntak ana hikhinta hi. Kilakna laibu gelh ahihlai in Smarna khawpi sumdawna munpi, khaw hausa leh inn thupi taktakte omna ahi a, Ephesa khawpi mallam mel 40 vel a gamla ah a om hi. Rom kumpipa biakna munpi leng ahi a, Rom kumpipa Tiberius Caesar lallai, A.D. 26 in Rom kumpipa biakinn hiai khawpi ah lamkhiat ahi. Smarna khawmi teng, khristiante tan in Rom kumpipa be dia lamet ahi a, kum khat a khatvei kumpipa biakinn a hoh a, “Caesar/Kaisar Toupa ahi” chi dia phut ahi uh. “Rom Kumpipa Ka Toupa Ahi” chi ut lou peuhmah suangkulh a khum ahihkeileh temsau a thah ahi uh. Huchi’n saptuam adi’n Smarna khawpi sawina leh hihgentheihna thupitak thuakna mun ahi a, kumpipa Nero lal hun, A.D. 54-68 sung leh Domitian lal hun, A.D. 81-96 sung khristiante’n sawina leh hihgentheihna thupitak a thuak uhi. Saptuam Pa Polycarp ngei leng Smarna saptuam mi ahi a, A.D. 155 in Rom kumpipa a biak ut louh ziak in martar in a si hi. Smarna saptuam sawi leh hihthei Rom kumpi kia ahi kei a, Smarna khawpi a teng Judate leng ahi uh.

Sawltak Johan in hiai lai a khak lai in Smarna saptuam sawi leh hihgentheih in om mahleh, Jesu Khrist adia muanhuai tak-a a dinkip ziak in Jesu Khrist adi’n gimnamtui ahi. Smarna saptuam sawina leh hihgentheihna tawn-a murra sing banga aat leh hihliam ahi a, himahleh Toupa adia a muanhuai ziak in Ama adi’n gimnamtui bang ahih ziak in a minput Smarna chih toh a kituak mahmah hi. Huai hun a Smarna khawpi tuni in Izmir a kichi a, Turkey gam a khawpi lianpen a sim a thumna ahi.

B. A Saptuam

Thukhun Thak Laisiangthou ah Smarna saptuam phutkhetu leh a kiphuhkhiatdan koimun mah ah genkhak hikei mahleh sawltak Paul in a missionary khualzin thumveina, A.D. 53-56 sung hun khat a a phuhkhiat hidia gintak ahi. Hiai thu gintaktheihna khat ahihleh Nasepte 19:10 ah Dr. Luke in Asia gam a om Grikte leh Judate teng teng in Toupa Jesu thu a zata uh, a chih ahi. Smarna saptuam kiang a laikhak pen laikhak dangte toh kibang lou in Toupa Jesu’n saptuam demna thumal khat lel leng a gen kei a, a kipahpihna leh phatna thu kia a gen hi.

II. JESU KHRIST AMAH A KIGENNA (Tang 8)

A. “Saptuam Angel”: Ephesa saptuam kiang a laikhak a i gen khit bang in “Saptuam Angel” kichi Smarna saptuam pastor/upa/zawlnei ahi. Laisiangthou hilhchiantu tamtak in sawltak Johan nungzui, saptuam pa kichi Smarna saptuam pastor Polycarp hidi’n a gingta uh. Hiai thudik hidi’n a gintakhuai a, huchi hileh Smarna saptuam pastor Polycarp khut tawna Johan in hiai lai khak chihna ahi.

B. “A Masapen leh a Nanungpen”: A masapen leh a Nanungpen hi a kigen in, Jesu Khrist in hun paisa a Amah ana om khinta leh tunung a leng om gige lai ding ahi, a chi hi. Thil teng siam ahih ma leh siam hih apat in Jesu Khrist ana omkhinta a, Amah thil teng siamtu (John 1:1-3) leh hiai khawvel leh mihing khang teng a bei khit nung tan a leng om lai ding Pathian ahi, a chi hi.

C. “Si a Hing Nawnta”: Si a Hing Nawnta hi a kigen in, Jesu Khrist in mikhialte sik leh tang a a khelhman uh pia a hong si leh melma teng nuaisiah a, ni thum ni a misi lak apan thounawn a si ngei nawn lou dia hing tawntungta ahi, a chi hi.

III. JESU KHRIST IN SMARNA SAPTUAM A THEIHDAN (Tang 9)
A. “Na Thilhihte”: John F. Walvoord in, “Khut a gelhthoh Thukhun Thak Laisiangthou muanhuai leh hoih pen a (Best and most reliable manuscripts) kigente ah hiai thumal nih, Na Thilhihte a om kei” a chi. Hiai thumal nihte tellou a i sim paisuak leh Jesu Khrist’ thugen a tang zaw nguut hi: Na gimthuak dan leh na zawn dan himahleh na hau hi, Judate hiloupi, ahi a kigen Setan’ kikhopna inn Pathian gensiatna ka thei hi.

B. “Ka thei”: Saptuam neitu leh ittu Jesu Khrist in Smarna saptuam hihna leh a thiltuahte a thei hi. Aman Smarna saptuam demna ding mu lou in thil teng ah a kipahpih zaw hi. Jesu Khrist in Smarna saptuam hihna leh thiltuah a theihte hiaite ahi uh.
1. A Gimthuakna
“Gimthuakna” kichi Grik thumal “thlipsis” ahi a, nengbelh (a pressing), nengbelh khawm (pressing together) sawnsuk (Press down) chihna ahi. Smarna saptuam toh kisai genna a zat ahihna ah hiai thumal in a gen ahihleh sawina ziak a gingtute’ gimthuakna leh gentheihna ahi. Peninsula Bible Church a kum 40 sung Pastor nna semkhinta Ray C. Stedman in a laibu gelh Understanding Revelation: GOD’S FINAL WORD ah Smarna saptuam gimthuakna, 1930 kumte a Germany a Judate gimthuakna toh a kinaih pen ding, a chi hi. Huai kumte ah German kumpi in Judate zinvial ding a kham bikbek a, a sumbukte uh hihsiat sak in, a vante uh laksuhsak a, a nekzonna uh a hihsiat sak hi. A kikhopna innte uh a hihbuah a, a hihsiat sak a, a neih-le-lamte uh a matsak hi. A zahlak sak a, a tuambawl a, zuau in a gensia a, vua in a sat a, tamtak a that hi.
Smarna saptuam in sawina ziak in gimthuakna, gentheihna leh savuak a om bang khop-a salam-a zawnna khawktak a thuak kia uh hilou in, gingtu bangzah hiam leng martar a thah a om hidi’n a gintakhuai hi. Hiai bang a Jesu Khrist adia muanhuai tak-a sawina leh gimthuakna a thuak uh Jesu Khrist in kipahpih hi.

2. A Zawnna Uh
Grikte’n zawnna genna thumal nih a nei ua, huaite “Penia” leh “ptocheia” ahi. “Penia” in tampi neilou a zawnna a gen a, “ptocheia” in bangmah neilou, hawmsuak khop-a zawnna a gen hi. Hiai a “zawnna” kigen Grik thumal ptocheia ahi a, bangmah neilou a, hawmsuak khop-a zawnna ahi. Jesu Khrist adia a muanhuai ziak un Smarma saptuam sawi in a om hi. A sawitute’n gim a thuak sak kia uh deihkhop lou in a neih leh lamte uh natan thagum in laksak uhi. Hiai in gingtute bangmah neilou, hawmsuak khop in zawng sak hi.

Jesu Khrist in a kiang uah “Na Zawn Dan Uh” ka thei a chih toh kizom in “Na Hau Uh” a chi hi. Jesu’n Khrist “Na Hau Uh” a chih Khalam Hauhna ahi. Sawina ziak in salam ah gimthuak in zawng mah-le uh khalam ah bel a hausa uhi. Salam a a gimthuakna uh leh a zawnna un Pathian a lou-theilou a kuul leh poimoh ahihna uh phawk sak a, Pathian ngai in naihsak sem a, Pathian adia muanhuai sak sem sem hiding ahi. Hiai ahi Jesu Khrist in a kipahpih, khalam-a a hauhna uh. Smarna saptuam hauhna, hiai khawvel thil ah hilou in, van a kholkhawm khalam thil ah ahi zaw (Matthai 5:11-12; 6:20; Luke 12:21). Jesu Khrist in salam a hausa himahleh khalam a zawng gingtu leh tualsung saptuam hilou in, salam a zawng himahleh khalam a hausa gingtute leh tualsung saptuam ahi a kipahpih, chih thu poimoh tak ahi.
Aban Sutzop Ding

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBC Media