Bible Study | KTZ

SMARNA SAPTUAM KIANG A LAIKHAK

Khalui (August) issue sutzopna

3. Gensiatna
Paite Laisiangthou ah “Pathian Gensiatna” kichi mah leh Sappau Laisiangthoute ah “Pathian” kichi thumal a om kei a, “blashphemy” ahihkeileh “Slander” kichi hi. Hiai in gensiat a ompen Pathian hilou in, Smarna saptuam ahi zaw, chih a kichian sak hi. Kumzabi khatna hun in thuzuau a Khristiante gensiatna leh demna thuleeng a tam mahmah hi. Huaite lak a khenkhat hiaite ahi uh:
a. Khristiante’n Toupa’ Nitak Ankuang a um chiang ua, Jesu Khrist’ sapum ne a, a sisan dawn chih thute gen zel zel uhi. A gensetute’n hiai thu pansan in Khristiante mihing sa nete (cannibals) ahi ua, a kimuh khawm chiang un a sa uh amau leh amau leng kinetuah uh chi uhi.
b. Khristiante’n pusa-pisa bia innte a pathian a biak utlouh ziak un, gingloumite’n simmoh in eengkou zial zial uhi.
c. Khristiante’n, khat leh khat kihiangtuah chiat i hi ua, khat leh khat kiituah chiat ding uh ahi, chia a kihasotna uh leh “Tawp Siangthou” (Holy Kiss) chih thumal a zat zelte uh, gingloumite’n lakawi in Khristiante’n a tenna inn ua Pathian be ding leh kithuah khawm dia a paikhawm chiang un, zahmohhuai thil tuamtuam a hih zel uh, chi’n ngoh uhi.

Hiaite, thil thumte, mah leng Smarna saptuam thuzuau gensiat a omna uh hiding hi. Thuzuau a Smarna saptuam gense mite gingloumite kia hilou in, Smarna a teeng Juda hiloupi ahi a kigente leng ahi uh. “Juda hiloupi, ahi a kigente” kichi salam ah Judami himahle uh khalam a Judami hiloute genna ahi (Rom. 2:28-29). Hiai mite’n amau suangpa Abraham’ ginna bang ginna a nei kei ua (Luke 3:8, Johan 8:40); Jesu Khrist a nial ziak un Pathian’ tate hilou in Setan’ tate ahi zaw uh (Johan 8:44). Setan thuzoh leh fuihsiat a om in Smarna saptuam a gingtute ahithei tan a dou in thuzuau in a gensia uhi. Setan thuzoh leh fuihsiatsa a Smarna a Pathian’ saptuam dou leh gense dia kikhawm/paikhawm migiloute ahih ziak un Jesu Khrist in a kikhopna inn uh Setan Kikhopna Inn a chi hi.

Johan sih nung kum 50 vel A.D. 155 in Smarna saptuamte pastor Polycarp kum 86 a upa, Rom kumpipa Kaisar a biak utlouh ziak in meikuang a hallup in a om hi. Polycarp sihna ah ginglou Judate’n leng kigolh khakna a nei uhi. The Ecclesiastical History 4:15 ah hiai thu a kigelh hi: “Vaihawmna innpi a Polycarp tungthu gen ahih lai in Smarna a ginglou Judate’n milimbemite toh pangkhawm in Polycarp sihsak ding in siamlouh a tangsak uhi.” Eusebius in “Smarna a Polycarp meikuang a hallup ahihna ding sing kaikhawm in Judate kilawp tak in a vialdian uh” a chi hi.

IV. JESU KHRIST IN SMARNA SAPTUAM A HILHKHOLHNA, A HASOTNA LEH A THUCHIAM (Tang 10-11)
A. A Hilhkholhna
Jesu Khrist in Smarna saptuam in mailam a a thuak pah ding thil khat hilhkhol hi. A hilhkholh thil ahihleh Diabol in a lak ua khenkhat suangkulh a ni 10 sung a khum ding ahi. Smarna saptuam a gingtu suangkulh a khum a om dingte’n a zoh louh ding tan ua a thuak ding uh Jesu Khrist in phal lou in, a thuak zoh ding tan uh ni 10 sung in hihtom sak hi.
“Diabol” kichi Grik thumal “diabolos” ahi a, thumal nih “dia”, dal/kalh chihna leh “ballo”, deng/lawn (Throw) chihna ahi. Diabol tuh unaute hektu ahi a, (Kilakna 12:10), aman heknate in gingtute a deng/ lawn hi. (Job1:6; Zakaria 3:1-2). Smarna saptuam a gingtute khenkhat suangkul a ni 10 sung khum ahih ding uh ze-et a a om theihna ding uh ahi. Setan in a ginna uh long siat bang a hihsiat a tupna a suangkul a ni 10 sung a khum ding pen mah Pathian in a ginna uh ze-etna, huai bel a ginna uh a kipdan kilatkhiatna hun lemtang in a zang ding hi (Jakob 1:1-4). Khemna Setan apan ahi a, huai Setan’ khemna mah Pathian in khem a om gingtute’ ginna zeetna a a zat ziak in gingtute’n khemna a tuah uh Pathian in phalsak hi. Hiai Pathian’ nasep dan ahihna Thukhun Lui a Job thuakna ah i mu hi (Job 1-2).

B. A Hasotna
1. Laulou Ding In
Jesu Khrist in sawina ziak a a thuak pah ding uh lau lou ding in Smarna saptuam hasuan hi. Jesu Khrist a a neihsa uh tangtawn vualzawlna manpha tak sawina in lamang thei lou ding ahih ziak in huai sawina a lauh ding uh ahi kei. Bang teng a tung uah tung mahleh Pathian’ khut a om ahi ua, a tuah uh leh thuak teng uh Pathian in amau hoihna ding leh Amah (Pathian) thupina dia a phalsak ahih ziak in sawina leh gimthuakna amau adia lauhuai lou ding mah ahi.
2. Sihpha a Ginom Ding In
Jesu Khrist in sihpha a ginom ding in Smarna saptuam hasuan hi. Hiai hun tan ah ginna ziak a sihloh hial kuamah om nailou hihtuak hi. Sawina tawn a a ginna uh ze-etna a tuah chiang ua sih a kuul leh leng siding khop a Jesu Khrist adia ginom dia hasot ahi uh. A hinna uh mansuah hial mahle uh a hauhsakna diktak uh hiai khawvel ah hilou in van ah ahi zaw a, a sihna uh leng thupina gam a lutna kongkhak ahi zaw.

C. A Thuchiam
Sihpha a ginomte kiang ah Jesu Khrist in thil nih a chiam hi. A thuchiamte ahihleh –
1. Hinna Lallukhu
Hiai lallukhu ahihleh tunung a vangam a atak a muhtheih a alu ua a khuk beeubaau ding uh hilou in, tangtawn hinna mah ahi zaw. Sihpha a a ginomna uh hiai khawvel pawtsan a, gimthuakna teng om nawn louhna leh tangtawn hinna bukim neihna mun, Pathian kiang a lutna ahi, chih Smarna saptuam in a theih uh Jesu Khrist in a deih hi.

2. Sih Nihna Hihnat a Omlouhna
“Sih Nihna” kichi meidiil ahi a, hinna laibu a min kigelh a muhlouhte uh (Jesu Khrist Toupa leh Hondampa a pom loute) tangtawn a gimthuak dia paihlut a omna mun uh ahi (Kilakna 20:14). A Vualzoupa kichi sihpha a Jesu Khrist adia ginomte kia genna ahi kei a, gingtu tengteng genna ahi. Hiai a kichetna ahihleh “Pathian suahsak peuh in khawvel a zouzel hi; hiai ahi khawvel tung a vualzohna, i ginna uh. Jesu Pathian Tapa ahi chih gingmi kia ngallou, kua’n khawvel a zou zel a? (I Johan 5:4-5) chih thu ahi. Jesu Khrist ginna tawn a hotdam hita gingtu teng, gingloumi teng tangtawn a gawt-a a omna mun uh, meidiil hihnat in a om kei ding uh. Aziak bel Jesu Khrist a ginna uh tawn a amaute siamtansak ahih khit tak ziak un (Rom 5:1; 8:1).

V. JESU KHRIST IN SMARNA SAPTUAM A CHIALNA
Jesu Khrist in Smarna saptuam chialna poimohtak khat a pia hi. A chialna ahihleh “SAPTUAM KIANG A KHA THUGEN BIL NEI PEUH IN ZA HEN” chih ahi. Hiai laikhak a thute a Pastor/Upa/Zawlnei tawn a Smarna tualsung saptuam kiang a thugen himahleh limsak leh zui dia chialte gingtu mimalte ahi uh. Smarna tualsung saptuam mi tamtak himahleh Jesu Khrist toh kizopna leh Amah thumanna kichi a pawl thu leh vaai hilou in, gingtu mimal toh kisai ahi zaw. Laikhak a thute saptuam michih in ngaikhia a zui chiat dia chial ahi uh.

KIVELNA DINGTE:
Salam a hausa himahleh khalam a zawng gingtu mimal leh tualsung saptuam i hi hia? Ahih keileh salam a zawng himahleh khalam a hausa i hi zaw hia? Salam a hauhsakna kilatkhiatna Biakinn lian leh hoih, sum leh pai tamtak, biakinn vanzat hoih tak tak, saptuam mizah tamtak, chihte leh adang dangte ahi a, khalam a hausakna kilatna ahihleh pianthakna, Laisiangthou toh kituak hinna, Khamangthangte veina, thumna, thugin dik kepbit leh sinsak, kiituahna, tagah leh meithaite awlmoh leh kep, chihte leh adang dangte ahi uh.
Smarna saptuam bang a Jesu Khrist ziak a gimthuakna a leng a ginom gingtu i hi hia? Ahih keileh Jesu Khrist ziak a gimthuak genlouh, mi neih bang leh neihzah enna ziak a i diktatna leh sianthouna mansuah, Jesu Khris adia ginom paisuak zou lou gingtu i hi zaw hia? Nang hon mu gige leh hon theichiante’n bangchi bang gingtu in a hon thei ua? Jesu Khrist in koimun peuh, thil khempeuh leh hun teng a Amah adia sihpha a ginom di’n A hon deih hi.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBC Media