High School Inspection 2025

Central School Sub Committee (CSSC) apan team 2 kibawl in September 24-26, 2025 sung CES nuai a High School 5 omte etkhiakna (Inspection) neih ahi. Team-1 ah Upa K Vungzamawi, Chairman makaih in Pu Siamnunlian Valte (absent) leh Upa T Langsanglian, Coordinator Dev. Dept. ahi ua, Team-2na ah Rev. Nenglian Vualnam, Upa Jamdouthang Guite leh Md. Biakmawi, Coordinator CESTTI hi uhi.

Team 1na leh 2na kigawm in September 24, 2025 in Kaikho-en Academy, Suangdoh etkhiakna nei uhi. Hostel mun dia PCI (R) gam kilei 3.01acre vel a lian, amun mahmah va sik in huai apan hostel etkhiakna nei uhi. TBUC & LSC toh hun zatna Headmaster Quarters ah nei ua, zing an nek zoh in school lam ah naupangte leh teacher-te toh hun zangkhawm uhi.

Team-1na: Thanlon ah nitak in TBUC & LSC toh hun zang khawm uhi. Sept. 25, 2025 zinglam in school ah naupangte leh teacher-te toh hun zang ua, nitaklam in Sinzawl ah School etkhiakna sunzom in naupangte leh teacher-te toh hun azat zoh un TBUC & LSC toh hunzang uh a, nitaklam 3:30PM vel in hong pai ua 8:00 PM vel in hong tung uhi.

Team-2na: Mimbung ah, DEC/Sialkal in vaidawnna ankuang ana umpih uhi. Sept. 25, 2025 zing in school a devotion hall lamna ding mun etkhiakna nei in TBUC leh LSC toh kithuahkhawmna/ houlimna hun sawtkuam zang uhi. Zing an nek zoh in school lam ah naupangte leh teacher-te toh hun zalentak in zangkhawm uhi. Nitaklam in Teikhang a Emmanuel School ah naupangte leh teacher-te toh hun zang masa uh a, huaizoh in TBUC leh LSC toh hun saulou school mun mah ah zangkhawm in nitaklam ankuang umkhawm uhi. Nitak in mipi biakna kikhop om a Upa Jamdouthang Guite in saptuamte chibai bukna gen in Rev Nenglian Vualnam, Director of Development in thutak genna hun zang hi. Sept. 26, 2025 zing in Lamka zuan in nitaklam 12:30 pm vel hong tung uhi.

Taksap tampi om mahleh Saptuam’ etkol school te’n masawn zel uh hi a muh ahi. Semtute’n theihtawp suah in panla chiat uh hi a theih in om a, administrative reform tungtawn a academic improvement hong om lai ding lamet huai hi. TBUC leh LSC in naktak in school nasepna nungthuap in a poimoh tampi ana suktuahsak zel uhi. Khalam kikepna leh laisiamna tonkhawm tou zel mah hi a muh in om hi.