EBC Tuailai Khawmpi ahihleh kum nga hal a kineizel ‘Khawmpi’ ahi. EBC saptuam sung a tuailaite tengteng kimuhkhawmna ahi. Hiai khawmpi in Bible toh kituak leh khalam a halhthakna tungtawn a kisinsakna leh muhkholnate tungtawn in tuailaite a lak a kikhekna tuntu in ana pang zel hi. 1968 a akipattung apat niamchik a ana kipan himahleh, tuailaite hindan naktak a ahon khek ban ah, i-gamsung ah khalam a khantouhna naktak in hon tun hi. Hiai Tuailai Khawmpite ah Nungzui bawlding a Thupiak-Gol (The Great Commission) tuh a khuam poimohpen ana higige hi. Tuailai Khawmpi ana omkhinte leh a Thupite kizomtouhdan et in, Khasiangthou in hiai khawmpite tungtawn a Pathian nna sem ahihdan chiangtak a muhtheih in om hi. Plenary Session leh Seminar-te tungtawn in tuailaite lak ah missions ngaihpoimohna leh Pathian Kumpigam leh khotang khantouhna a kitontheihna ding a panlak a poimohnate theihsiamna hon tun hi.

Tuailai’87 in khawmpi saidan naktak in hon kheng a, saptuam khangthu a khawmpi lohching mahmahte lak a khat a chiamteh theih in om hi. Huai nungsang, khawmpi kisaitoute ah Tuailai’87 naktak in sulzuih in om hi. Huai khawmpi “Tuailai Khrist aa ding in” chih thupi pansan a sai hi a, Tuailai’90 ah “Tuailai midangte aa dingin” chih thupi pansan in Khrist-a-kibulphuh phathuamngaihna leh midangte awlmohna lam ah kisinsakna ana paipih hi. Tuailai’95 ah “Tuailaite Gam lading in” chih thupi ana kipansan a, tuailaite lungsim ah khovel kil-chih huam a missions nasepna leh Khrist tanchin thehzakna nasep lam ah hon kawkmuhtu in pang hi.

Tuailai 2000 in “Tuailaite Missionary ding in” chih thupi pansan in tuailaite lak ah Missionary a kuankhe ding a sapna tangtak in ana paipih hi a, huai khawmpi tungtawn in EBC tuailaite lak ah 10/40 window kichi putlakna masapen neih in om hi. Tuailai’2005 ah “Tuailaite Khovel Kheng dingin” chih thupi pansan in tuailaite lak ah “kikhekna palai” hiding a chouna naktak a bawl hi a, “unapologetically holistic approach” kichi pansan a kideklou leh laulou a khrist nungzuihna leh missions nasepna toh kisai kisinsakna masapen leng ahi. “Extra-Mile for Christ” chih thupi pansan in, Tuailai2010 in nungzui hangsan leh bawlna ding in a chi tuh hi.

Huchibang a subuaitu bangmah omlou a Tuailai Khawmpi thupitak a ana kizangtou pen Tuailai 2015 ah hong hitheikei hi. Himahleh, Khasiangthou in saptuam kuamah in ana ngaihtuah batlouh ding khop a thupi nna ahon sepna tungtawn in, khawmpi masate sang a niamzawlou, phetlou a, thupi zaw thei ding khop a gahsuah muhtheih in hong om hi. Hiai khawmpi gahsuah a chituamna mahmah ahihleh Khristian tuailaite lak liauliau ah Nungzuihna leh Khrist batna toh hinkhua zatding lunggulhna chi hon tuh hi. Tu inleng, Tuailai 2015 tuh diktatna, lungsim siangthouna leh gamgi nei a dinkipna toh mekmattheih in om a, amin lamtom in “TuailaiPro” chih a theih in omden hi.

Hiai khawmpi kizat theihlouhna hong kizomtou a, Tuailai2020/Missions-Tuailai2020/MT 2020 hun in Covid-19 hileng huaisetak ziak in khovel pumpi kum nih sung hentang in om hi. Hiai hun inleng, Pathian in nna honsem a, khawmpi kizangtheilou himahleh A saptuamte’n punna thupitak muhtheih ding om hi. MT2020 ahihleh kumkhat sung nasepna kong tuamtuam ah kisemsuahte zohkhiakna saawngpi hiding a chiim-tak a geel ahi. Hiai khawmpi in kong nih ah nasem a, khatna ah tuailaite tangthupha zanailou khovel kiltuamtuam a gammialte ah kuankhe ding a sinsakna leh sawlkhiak ah kal ana suan a; a nihna ah, i gamsung a tuailai-tansete lak a Pathian itna-nasepna lam ah naktak in kal ana suan hi. Huchi in, lockdown lai himahleh, sepding a geel a omte kumtawn a sepsuahna ana paitou a, a khawmpi muhtheih in thupi lua in kilangkhekei mahleh, saptuam a ding a amasapen ding chiamtehtham thil tampi sepsuah in om hi. Saptuam in tangthupha tunnailouhna Khovel kil tuamtuam ah Missionary 20 val sawlkhia in Global Missions ah nasepna hon pan thei hi.

Huai kia hilou in, Tuailai2015’ suul nungzuih in, tuailaite lak a nungzui-bawltu ding kisinsakna leh lamhilhna lam a semtu ding a kipekhia nungzui muanhuai hon bawlkhia hi. Huaiziak in, tua kum nga hal a i khawmpi - Tuailai 2025 - zang di’a i hong kisak toh kiton in, hun paisa a Pathian hon pina leh ompihnate enkiklou-thei i hikei a, tutung khawmpi leng, Pathian in a deihlam sepsuahna dia hon zang nawn ding ahi chih upna liantak nei kawm in, i kipak lou theikei hi. Huaiziak in, Jesu Khrist a ginna leh lametna a suakkhia hangsanna leh muanna toh hiai Tuailai 2025 guhgeel ka hon pulak uhi.

Tuailai 2025 tungtawn a tuailaite A Lalgam kekletna a kizang ding a thopna leh kizatna ding a Pathian in a lemgeelsa hiding in ka gingta uhi. Khawmpi paisate leh a gahsuah enkik leng, tua Salam leh Khalam a i dinmun toh etkak in, tu dinmun a i poimoh uh leh ma i suantouhna ua i sepsuahding ua poimoh tengteng thumal khat in huam khathei hi. Huai thumal tuh “NUNGZUIHNA” ahi. I saptuam Salam leh Khalam a i khantouh zel nading ua nungzui i bawl ua, amaute nungzui bawltu ding a i sinsak uh poimoh hi. Tu hun ahi kidamlouhial a nungzuihna nna i sep ding; i hinkhua huai a akingak ding ahi, i kingakna thubul huai ahih ding ahi. I gingtu hinkhua lam chiteng a i sepsuahding (i Mission) ahih ding ahi. Tuailai2015 leh MT2020 tungtawn in Nungzuihna in kikhekna ahontut theih dan muhlawkna i neita hi.

Huai hun apan i thumna, i thugen, i telsuina leh i houlimna teng in tuhun ahon tunta hi. Tuailai 2025 tuh khawmpi paisate tungtawn a Pathian in a phuhkhiak bulpi pansan a kilamtou hong hiding hi. Tanchinhoih puanzakna Kha in hong ompihlai a, tuhun kan a nungzui bawlna nasep apoimohhun leh awlmohhuai hun a om naikei, adiak in saptuam ah. Huai ziak in masawnna ding a lampi om sun tuh Gam teng ah Nungzui bawlding a Nnagotna Thupi (Great Commission) ahi.

Tanchinhoih puanzakna tuh Nungzuihna toh kiton ahi chih i muthei. Nungzuihna nasep kibulphuhna ahi. Huai ziak in, Tuailai2025 in a tup tuh hiai ahi - Nungzuihna leh Nungzui-bawlna; mahni utna a suakkhia nungzuihna lamtouh ding. Tuailai 2015 kalsuanna leh MT2020 panlakna/kiginkholna paidante laktouh ahi ding. Huai ziak in Tuailai 2025 tuh nasepna paizom hiding a, huai a vaiguan tuamtuam kizomtou in, Kum 60 chin kipahthugenna leh Pathian thupina leh A lalgam kekletna ding a muhkholna putlakna hiding hi.

Note: Hiai Tuailai Khawmpi ahihleh tu apan in kum thum hal a neih hita ding hi.