Zan August 23, 2026 (Nipini) nitaklam dak 1:00 PM in EBC Lamka West Division makaih in Songpi khosung a saptuam thum omte – Kuki Christian Church (KCC), Kuki Baptist Church (KBC) leh Evangelical Churches Association (ECA) te toh “Oneness in Christ” (Gal 3:28) chih thupi a nei in Pathian biakkhawmna hun nuamtak in zang uhi. Hiai hun ah Lamka West Division apan tualsung saptuam tuamtuam apan mipi tampi paikhawm uhi.
EBC, KBC, KCC leh ECA apan in thugen na hun saulou chiat leh Tuailai-te apan phatna lasakna hun om a, thugenpi in Rev. Dr. Kh. Khaizakham Former Principal ECT pang hi. Rev Pumsuanmung Naulak DS, LWD in Special Item hun ah “Khrist a Khat” hihna a tak a taklatna hiding in pawltuam tuam-te apan saptuam Upa, Numei Makai leh Nungak leh Tangval khat chiat samkhia in khut kilen in thumsakna hun zang hi.
Hiai program ah mipi paikhawm 500 vel pha ding a gintak ahi a, program zoh in theitui leh sang nekkhawmna nei in program manphatak in zangzou uhi. Paikhawm mipite’n nuam leh manpha sa mahmah in hiai dan program a tamthei lam sai poimoh ahidan gen uhi.
EBC Headquarters
New Lamka, Churachandpur - 795006, Manipur, India
