EBC Hostel, Suangdoh ah Hostel Building thak honna om

EBC Hostel, Suangdoh campus thak ah tuni April 6, 2026 in naupangte om na'ng dormitory building thak nih honna leh latna Rev. K. Kamchinkhup, General Secretary in nei hi. Program zing 7:30AM in kipan a, hiai hun ah Rev. Khamkhanchin Ngaihte, Divisional Supdt. Singngat in patna thumna nei a, Upa M Tuanlemlal, Secretary TBUC EBCC Suangdoh in vaidawn thugenna nei hi. Rev Nenglian Vualnam, Director of Development in Dormitory building thak nihte pulakna leh report piakna nei a, Upa K. Vungzamawi, Chairman CSSC & HSMC in kipahthugenna leh hanthawnna thugen in Rev Thawndoulian, Director of Missions in hunkhakna thumna nei hi.

Hiai Dormitory building thakte ah naupang 48x2= 96 ta zou ding a ngim ahi a, Asst. Warden numei leh pasal in dormitory khat tuak ah giahpih in enkai ding uhi. Building bawlna leh site/land development lam Tunnu Engineering in etkaisak hi. Hiai program ah CSSC apan Upa G Jamdouthang, Upa T. Langsanglian, leh DS/LWD, DS/LSD, ban ah khosung hausa Pu Paukhenkhup Guite leh Upa T Kaithang te'n uap in thugenna leng nei uhi.