Thanlon Division a om Bukpi khua leh akim ah Luna, Chisa leh Luak kithuah natna chi khat hong kithehdalh ziak a damlou mi tamtakte awlmohna ziak in EBC Basic Health Care Services (BHCS) apan Dr Lalte Hauzel (s/o Dr Chhawnvung) leh Nurse nih in damdawi hawm ding tamkhop pua in 19/8/2026 zing in Bukpi khua delhtou uhi. Huai ni mah in damloute etna panpah in nitak zan sawt nung tanpha damlou en, damdawi a-thawn a hawm leh apoimohte drip khai in zankim dak 12 tan in panla uhi. Zan nitak tan in damlou 147 en man uhi.
Tuzing (20/8/2026) 7:00am apan damlou et sunzom in sun dak 12 tan in damlou 100 vel en in BHCS teamte Lamka hong kileh kik uhi.
Zan mah in Thanlon apan MO leh Bukpi PHSC Nurse team ten leng phatuamngaitak in a na delhpah uh a, damlou tamtak na enkol man uhi. Amau bel nitak in Thanlon ah kilehkik nawn uhi.
EBC Headquarters
New Lamka, Churachandpur - 795006, Manipur, India
